Лукашенко Беларусда Россия авиабазаларини ташкил этиш масаласини Путин билан муҳокама қилади

Беларусь президенти Александр Лукашенконинг маълум қилишича, у Россия президенти Владимир Путин билан Беларусь ҳудудида Россия ҳарбий базаларини ташкил этиш масаласини муҳокама қилади. Бу ҳақда «ТАСС» хабар бермоқда.

«Биз Владимир Путин билан мазкур масалани муҳокама қиламиз, агар Россия кўриб, биз сезмай қолаётган бирор нарса бўлса, бу ҳақда Путин бизга айтади», — деди Лукашенко.

Беларусь президентининг сўзларига кўра, «агар ҳарбий-ҳаво кучлари масаласи қатъий бўлса, у ҳолда ўша 24 самолётни Беларусга беришсин». Айни вақтда, Лукашенконинг қўшима қилишича, «агар шунчаки беришни хоҳлашмаса, ижарага беришсин».

6 октябрь куни Беларусь президенти мамлакат ҳудудига Россия авиабазасини жойлаштириш ҳақида гап-сўз йўқлигини маълум қилганди. «Бизга бугун база, бунинг устига ҳарбий-ҳаво кучлари базаси керак эмас. Бизга маълум бир қуроллар керак. Мен бу ҳақда Путинга ҳам, аввалроқ Медведевга ҳам айтганман», — деди Лукашенко.

Унинг сўзларига кўра, беларусларга «бугун самолётлар керак, базалар эмас».