UYeFA prezidenti Mishel Platini FIFA axloq qo‘mitasi uni lavozimidan 90 kunga chetlatish yuzasidan qaror qabul qilganiga munosabatini bildirdi. Bu haqda “Chempionat” xabar bermoqda.
“FIFA axloq qo‘mitasi tergov palatasi arbitraj palatasiga meni 90 kunga ishdan chetlatishni tavsiya etish niyatida ekanligi ma’lum bo‘ldi, — deya ta’kidlaydi Platini. —Garchi hech kimga bo‘ysunmagan holda, mustaqil faoliyat yuritishi lozim bo‘lgan axloq qo‘mitasi hali bunday qaror qabul qilmagan bo‘lsa-da, FIFA rasmiy manbasidan shunday ma’lumot berilganini meni obro‘sizlantirishga urinish, deb bilaman.
Surishtiruv ishlarini olib borayotgan idoralar bilan har qanday hamkorlikka tayyor ekanligimni ko‘p takrorlaganman. Agar FIFA axloq qo‘mitasi tergov palatasining meni lavozimimdan chetlatish niyati haqidagi ma’lumotlar to‘g‘ri bo‘lib chiqsa, to haqiqat yuzaga chiqmagunicha hech narsadan qaytmayman”.
Platini FIFA prezidentligi uchun kurashni to‘xtatmaganini bildirib, mazkur lavozimga nomzodini qo‘yish uchun lozim bo‘lgan qo‘llab-quvvatlash maktublarini topshirganini ma’lum qilgan.
Izoh (0)