Markaziy razvedka boshqarmasi direktori Kennedining o‘limi tafsilotlarini yashirgan

Markaziy razvedka boshqarmasining sobiq direktori Jon Makkon AQSh prezidenti Jon Kennedining o‘ldirilishi haqidagi axborotni Uorren komissiyasidan yashirganlikda gumon qilinmoqda. Bu haqda “Gazeta.ru” xabar bermoqda.

Kennedining o‘limidan 50 yil o‘tib MRB tomonidan e’lon qilingan hisobotda ta’kidlanishicha, Markaziy razvedkaning yuqori martabali vakillari ham axborotni yashirishda qatnashgan. Hisobot Milliy xavfsizlik arxivida e’lon qilingan.

Tergov ma’lumotlariga ko‘ra, MRB xodimlari Uorren komissiyasi asosiy e’tiborni Li Xarvi Osvald yakka o‘zi, hech qanday sabablarsiz qotillikni amalga oshirgani haqidagi versiyaga qaratishi uchun, muhim axborotni yashirishga uringan.

Jon Makkon komissiyaga MRB Kuba yetakchisi Fidel Kastroni o‘ldirishga ko‘p marotaba uringani haqida ma’lumot bermagan. Bu axborotsiz komissiya Osvaldning Kubadagi yoki biror boshqa mamlakatda sheriklari borligini aniqlay olmasdi.

E’lon qilingan hisobotda Makkon axborotni nima maqsadda yashirganiga aniqlik kiritilmagan, biroq, taxminlarga ko‘ra, u Oq uy vakili bo‘lgan.

“Makkon MRBning Fidel Kastroni o‘ldirish bo‘yicha rejalari haqidagi axborotni ma’lum qilmagani komissiyaga bo‘lgan ishonch yo‘qqa chiqardi”, — deyiladi hisobotda. Hisobot mualliflarining qayd etishicha, ma’lumotlarni yashirgani uchun ham Makkonni Jon Kennedi qotilligiga sherik deb hisoblash mumkin.