Pekindagi xalqaro marafonda yetti kishi infarkt bo‘ldi. Bu haqda The South China Morning Post xabar bermoqda.
Xitoy poytaxtida 20-sentabr kuni bo‘lib o‘tgan poygada jami 30 mingga yaqin odam qatnashgan. Olti nafar poygachi va tadbirni kuzatayotgan amaldor yurak xuruji bilan kasalxonaga olib kelingan. Jabrlanganlar orasida eng kichigi 30 yoshda. Marafon kuni Pekinda havoning yuqori darajali ifloslanishi qayd etilgan bo‘lsa-da, musobaqa baribir o‘tkazildi va ko‘pchilik ishtirokchilar niqobda qatnashdi.
Shahar ma’muriyatining ma’lum qilishicha, o‘tgan yilgi xuddi shunday marafon vaqtida Pekinda havo ifloslanishining “ko‘k” rangli darajasi qayd etilgan. Bu atmosfera holati ochiq havoda tadbir o‘tkazishga to‘g‘ri kelmasligini ko‘rsatadi. Shunga qaramay bu holat tashkilotchilarni to‘xtata olmadi va musobaqa o‘tkazildi.
Havoning ifloslanishi Xitoy uchun katta muammoga aylangan: Berkeley Earth tadqiqot markazining ma’lumotlariga ko‘ra, ushbu murakkab vaziyat tufayli mamlakatda har kuni to‘rt mingdan ziyod odam vafot etadi. 2017-yilga borib Xitoydagi barcha avtomobillar “Xitoy-5” standartiga o‘tkazilishi lozim, unga ko‘ra avtomobillardan chiqayotgan zararli gazlar miqdori 30 foizgacha qisqarishi kerak.
Izoh (0)