2015-yilning 14—17-sentabr kunlari sog‘liqni saqlash vaziri A.Alimov rahbarligida O‘zbekiston Respublikasi delegatsiyasi Litvaning Vilnyus shahrida Jahon sog‘liqni saqlash tashkiloti Yevropa mintaqaviy byurosining 65-sessiyasida ishtirok etdi, deya xabar bermoqda sog‘liqni saqlash vazirligi rasmiy sayti.
Tadbir kun tartibiga “Salomatlik-2020” siyosatini amalga oshirish masalalari muhokamasi kiritildi. Sessiya kun tartibining keyingi masalasi 2015—2020-yillarda sog‘liqni saqlash tizimini takomillashtirish bo‘ldi, unda Tamakiga qarshi kurash bo‘yicha JSSTning Hadli konvensiyasi amalga oshirilishi, Yevropadagi sog‘liqni saqlash holati haqida ma’ruza tinglanishi, shuningdek, JSSTning Yevropa hududi uchun jismoniy faollik bo‘yicha strategiya va boshqalar muhokama qilindi.
Sessiyada Yevropa mintaqaviy byurosining turli qo‘mitalari tarkibiga 2015—2018-yillar uchun a’zolarni saylash jarayoni doirasida O‘zbekiston Respublikasi Sog‘liqni saqlash vaziri A.Alimov nomzodi Sog‘liqni saqlash va ekologiya masalalari bo‘yicha Yevropa Vazirlar Kengashi tarkibiga saylanish uchun ko‘rsatilishi ko‘zda tutilgan.
Sessiya ishida, shuningdek, Yevropa mintaqaviy byurosi Mintaqaviy byurolar tomonidan avvalgi sessiyalarda ma’qullangan rezolyutsiyalarning bajarilishi bo‘yicha oltita hisobot ko‘rsatdi.
Tadbir davomida navbatdagi “O‘zbekiston Respublikasi Sog‘liqni saqlash vazirligi va JSST Yevropa mintaqaviy byurosi hamkorligi to‘g‘risida 2016—2017-yillarga mo‘ljallangan ikki yillik bitim” hamda O‘zbekiston Respublikasi Sog‘liqni saqlash vazirligi va Litva Sog‘liqni saqlash vazirligi o‘rtasida sog‘liqni saqlash va tibbiyot fani sohasida hamkorlik bo‘yicha bitim imzolandi.
Izoh (0)