Osiyo taraqqiyot banki direktorlar kengashi O‘zbekiston hukumatiga mamlakat hududlarida elektr energiya hisobi va nazoratini avtomatik yuritish (EHNAYu) tizimini joriy etish uchun 300 million dollar miqdorida kredit ajratish haqidagi qarorni ma’qulladi. “12news.uz” xabariga ko‘ra, kredit kelishuvi 2015-yil oxiriga qadar imzolanishi kutilmoqda.
Umumiy qiymati 490 million dollarga teng bo‘lgan EHNAYu loyihasiga muvofiq, Andijon, Farg‘ona, Qashqadaryo, Namangan va Surxondaryo viloyatlaridagi elektr energiya iste’molchilari uchun 3,1 million dona hisoblagich qurilmalarini sotib olish va o‘rnatish ko‘zda tutilgan.
Loyiha to‘rt yilga mo‘ljallangan bo‘lib, OTB kreditidan tashqari, O‘zbekiston tomoni mablag‘lari hisobidan moliyalashtiriladi.
OTB 2011-yili O‘zbekistonning uchta viloyati — Buxoro, Jizzax va Samarqand uchun 1 million dona zamonaviy elektr hisoblagichlarni sotib olish va o‘rnatish uchun O‘zbekiston tomoniga 150 million dollar ajratgan edi.
Loyihaning umumiy qiymati 207,4 million dollarga teng bo‘lib, 2018-yilda amalga oshirib bo‘linadi. EHNAYu qurilma va uskunalari Korea Telecom tomonidan yetkazib berilmoqda.
Izoh (0)