“O‘zbekiston havo yo‘llari” milliy aviakompaniyasi Kanadaning CAE kompaniyasida ishlab chiqarilgan yangi trenajyor – A320 samolyotining Full-flight simulyatorini qabul qilib oldi, deya xabar bermoqda “12news.uz”. O‘zAning yozishicha, ushbu trenajyor yordamida uchuvchilar yuqori darajada real sharoitlarga yaqinlashtirilgan holatda parvoz etish ko‘nikmasini mustahkamlaydi va noodatiy vaziyatlarda harakatlanishni mashq qiladi.
A320 samolyotining Full-flight simulyatori aviatsiya xavfsizligi, yuqori malakali kadrlar tayyorlash tizimining samaradorligini oshirish borasidagi yangi bosqichdir. “O‘zbekiston havo yo‘llari” milliy aviakompaniyasi O‘quv-mashg‘ulot markazining trenajyor majmuasida o‘rnatilayotgan CAE kompaniyasining yangi ishlanmasi zamonaviy kompyuter ta’minoti, qo‘zg‘alish va vizualizatsiya tizimlari bilan jihozlangan. U o‘zida A320 samolyoti uchuvchilar xonasini mujassamlashtirgan.
Ayni paytda kanadalik mutaxassislarning birinchi guruhi montaj ishlarini amalga oshirmoqda. Sentabr oyi oxirida mutaxassislarning ikkinchi guruhi dasturiy ta’minotni va trenajyor uskunalarini sozlashga kirishadi. Bu ishlar yakunlanganidan so‘ng Milliy aviakompaniya uchuvchi-yo‘riqchilari CAE kompaniyasi mutaxassislari bilan tizimni sinovdan o‘tkazadi va qabul qiladi.
Trenajyorni baholash natijalari asosida O‘zbekiston “Davavianazorat” inspeksiyasi tomonidan yangi simulyatordan foydalanishga sertifikat beriladi. Trenajyorni texnik ta’minlash maqsadida birinchi bosqichda kanadalik mutaxassislar O‘quv-mashg‘ulot markazida aviakompaniyaning sakkiz nafar muhandisini o‘qitadi. Ularga mustaqil xizmat ko‘rsatish uchun ruxsat beriladi. Yangi Full-flight simulyatori noyabr oyining oxirida foydalanishga topshirilishi rejalashtirilmoqda.
Bugungi kunda Milliy aviakompaniyaning trenajyor majmuasida Boeing-757/767, A320 havo kemalarining zamonaviy trenajyorlari va O‘zbekistonda ishlab chiqarilgan “Il-114-100” samolyotining o‘ziga xos Full-flight simulyatori mavjud. FFS A320 foydalanishga topshirilishi bilan xorijiy o‘quv markazlarini jalb etmagan holda O‘zbekistonda A320 aerobuslari uchuvchilarini tayyorlash va qayta tayyorlash uchun zarur asos yaratiladi.
Izoh (0)