Samarqand viloyati mahallalarida “Keksalarni e’zozlash yili” Davlat dasturi ijrosi doirasida uch avlod uchrashuvlari bo‘lib o‘tmoqda. Bu haqda O‘zA xabar bermoqda.
Oqdaryo tumanidagi Po‘latdarxon mahallasida tashkil etilgan shunday tadbirga Ikkinchi jahon urushi va mehnat fronti faxriylari, yuz yoshdan oshgan tabarruk nuroniylar, “Kamolot” faollari va yoshlar taklif etildi.
“Bugungi kunda tumanimizda yuz yoshdan oshgan uch nafar onaxon istiqomat qiladi. Ular davlatimizning doimiy e’tibor va g‘amxo‘rligidan xursand. Prezidentimiz tashabbusi bilan Keksalarni e’zozlash yili, deb e’lon qilingan joriy yilda, ayniqsa, ularga ko‘rsatilayotgan hurmat-ehtirom yanada oshdi”, – deydi “Mahalla” xayriya jamoat fondi Oqdaryo tumani bo‘limi raisi Tug‘ral Hamroyev.
Jumladan, ularning pensiyalariga har oy eng kam oylik ish haqining yuz foizi miqdorida ustama bilan birga, davlat mablag‘lari va homiylar hisobidan uy-ro‘zg‘or buyumlari, oziq-ovqat mahsulotlari berilmoqda.
Bundan tashqari, “Mahalla” xayriya jamoat fondi mablag‘lari hisobidan Ikkinchi jahon urushi qatnashchilarining uy-joylarini ta’mirlash, maishiy sharoitlarini yaxshilashga ko‘maklashilmoqda. Yaqinda Mustaqillik bayrami munosabati bilan yuzdan ziyod faxriyga sovg‘alar topshirildi.
Tadbirda nuroniylarga “Mahalla” xayriya jamoat fondi tuman bo‘limi va homiylarning esdalik sovg‘alari topshirildi. Uchrashuvning eng yoshi ulug‘ vakili – Bozorjoy mahallasida yashovchi yuz yoshli Xadicha momo Kattayeva barchani duo qilib, yurtimizga tinchlik, elimizga omonlik tiladi: “Ilohim, yurtimizni yomon ko‘zlardan asrasin, O‘zbekistonimizni yorug‘ kunlarga olib chiqqan Yurtboshimiz doim omon bo‘lsin. Bizni ulug‘laganlar ham ulug‘ yoshlarga kirib yursin!”.
Izoh (0)