Самарқанд вилояти маҳаллаларида «Кексаларни эъзозлаш йили» Давлат дастури ижроси доирасида уч авлод учрашувлари бўлиб ўтмоқда. Бу ҳақда ЎзА хабар бермоқда.
Оқдарё туманидаги Пўлатдархон маҳалласида ташкил этилган шундай тадбирга Иккинчи жаҳон уруши ва меҳнат фронти фахрийлари, юз ёшдан ошган табаррук нуронийлар, «Камолот» фаоллари ва ёшлар таклиф этилди.
«Бугунги кунда туманимизда юз ёшдан ошган уч нафар онахон истиқомат қилади. Улар давлатимизнинг доимий эътибор ва ғамхўрлигидан хурсанд. Президентимиз ташаббуси билан Кексаларни эъзозлаш йили, деб эълон қилинган жорий йилда, айниқса, уларга кўрсатилаётган ҳурмат-эҳтиром янада ошди», – дейди «Маҳалла» хайрия жамоат фонди Оқдарё тумани бўлими раиси Туғрал Ҳамроев.
Жумладан, уларнинг пенсияларига ҳар ой энг кам ойлик иш ҳақининг юз фоизи миқдорида устама билан бирга, давлат маблағлари ва ҳомийлар ҳисобидан уй-рўзғор буюмлари, озиқ-овқат маҳсулотлари берилмоқда.
Бундан ташқари, «Маҳалла» хайрия жамоат фонди маблағлари ҳисобидан Иккинчи жаҳон уруши қатнашчиларининг уй-жойларини таъмирлаш, маиший шароитларини яхшилашга кўмаклашилмоқда. Яқинда Мустақиллик байрами муносабати билан юздан зиёд фахрийга совғалар топширилди.
Тадбирда нуронийларга «Маҳалла» хайрия жамоат фонди туман бўлими ва ҳомийларнинг эсдалик совғалари топширилди. Учрашувнинг энг ёши улуғ вакили – Бозоржой маҳалласида яшовчи юз ёшли Хадича момо Каттаева барчани дуо қилиб, юртимизга тинчлик, элимизга омонлик тилади: «Илоҳим, юртимизни ёмон кўзлардан асрасин, Ўзбекистонимизни ёруғ кунларга олиб чиққан Юртбошимиз доим омон бўлсин. Бизни улуғлаганлар ҳам улуғ ёшларга кириб юрсин!».
Изоҳ (0)