AQSh KXDR hujum qilganida Janubiy Koreyani himoya qilishga va’da berdi

AQSh mudofaa vaziri Eshton Karter, agar Pxenyan Janubiy Koreyaga hujum qiladigan bo‘lsa, Seulni himoya qilishga va’da berdi. Bu haqda CNN xabar bermoqda.

“Shimoliy Koreya uning istalgan ig‘vosiga nisbatan javob berilishini anglashi va bizni hamda janubiy koreyalik ittifoqchilarimizni mag‘lub etish uchun o‘zida hech qanday imkoniyat yo‘qligini tushunishi kerak”, — dedi Pentagon rahbari.

Uning qayd etishicha, Koreya yarimoroli — istalgan vaqtda urush boshlanib ketishi mumkin bo‘lgan jahondagi yagona hududdir. Avgust oyida Amerika harbiy qo‘mondonligi KXDR hujumiga qarshi Janubiy Koreyani mudofaa qilish rejasini tekshiruvdan o‘tkazdi.

Shimoliy va Janubiy Koreya o‘rtasidagi keskinlik 25-avgust kuni, bir qator ziddiyatlar va hatto artilleriya otishmalaridan so‘ng, ikki tomon kelishuvga kelganidan so‘ng pasaygan edi.