Kiyevdagi Oliy Rada binosi oldida bo‘lib o‘tgan norozilik namoyishining 18 ishtirokchisi vaqtincha hibsda saqlanmoqda. “Korrespondent.net”ning yozishicha, Rada ostidagi voqealardan so‘ng yana 10 kishi hibsga olingan, so‘roqqa tutilib, so‘ng qo‘yib yuborilgan.
Kiyev militsiyasidan ma’lum qilishlaricha, 1-sentabr, seshanba holati bo‘yicha Rada ostidagi tartibsizliklar vaqtida jabrlangan 141 kishi shahar kasalxonalarida davolanish uchun qolmoqda. Ulardan 10 nafarining ahvoli og‘ir ekanligi aytilmoqda.
Bundan tashqari, Ukraina parlamenti oldidagi namoyishchilar bilan yuz bergan to‘qnashuvlar vaqtida granatadan foydalangan maxsus xizmat jangchisiga nisbatan ehtiyot chorasi sifatida hibsga olish masalasi ko‘rib chiqilmoqda.
Eslatib o‘tamiz, 31-avgust, dushanba kuni Ukraina parlamenti konstitutsiyaviy islohot to‘g‘risidagi qonun loyihasini birinchi o‘qishda ma’qullaganidan so‘ng, Oliy Rada binosi oldida tartibsizliklar boshlangan edi.
Izoh (0)