Киевдаги Олий Рада биноси олдида бўлиб ўтган норозилик намойишининг 18 иштирокчиси вақтинча ҳибсда сақланмоқда. «Корреспондент.net»нинг ёзишича, Рада остидаги воқеалардан сўнг яна 10 киши ҳибсга олинган, сўроққа тутилиб, сўнг қўйиб юборилган.
Киев милициясидан маълум қилишларича, 1 сентябрь, сешанба ҳолати бўйича Рада остидаги тартибсизликлар вақтида жабрланган 141 киши шаҳар касалхоналарида даволаниш учун қолмоқда. Улардан 10 нафарининг аҳволи оғир эканлиги айтилмоқда.
Бундан ташқари, Украина парламенти олдидаги намойишчилар билан юз берган тўқнашувлар вақтида гранатадан фойдаланган махсус хизмат жангчисига нисбатан эҳтиёт чораси сифатида ҳибсга олиш масаласи кўриб чиқилмоқда.
Эслатиб ўтамиз, 31 август, душанба куни Украина парламенти конституциявий ислоҳот тўғрисидаги қонун лойиҳасини биринчи ўқишда маъқуллаганидан сўнг, Олий Рада биноси олдида тартибсизликлар бошланган эди.
Изоҳ (0)