AQSh Davlat departamenti Xitoyga qarshi sanksiyalar tayyorlanayotgani to‘g‘risidagi xabarlarni tasdiqlamadi

AQSh Davlat departamenti xakerlar yordamida Amerikaning tijoriy sirlarini qo‘lga kiritgan Xitoy kompaniyalariga qarshi iqtisodiy sanksiyalar qo‘llashga tayyorgarlik ko‘rilayotgani to‘g‘risida OAVda paydo bo‘lgan ma’lumotlarni tasdiqlamadi, ammo inkor ham etgani yo‘q. Bu haqda “ТАSS” xabar bermoqda.

“Sanksiyalar borasida hech narsa deya olmayman, ammo AQSh va Xitoy o‘rtasida kiberhududdagi faoliyat yuzasidan qarashlardagi jiddiy farq saqlanib qolayotgani bor gap. Bizni Xitoy ma’murlari noqonuniy yo‘l bilan shaxsiy va tijoriy ma’lumotlar qo‘lga kiritilishini qo‘llab-quvvatlayotgani haqidagi ma’lumotlar tashvishlantirmoqda”, — deya ma’lum qilgan departamentning rasmiy vakili Mark Toner.

Toner ushbu masala XXR rahbari Si Szinpinning AQShga sentyabr oyida kutilayotgan tashrifi chog‘ida Barak Obama bilan muzokaralarda muhokama qilinishi mumkinligini bildirdi.