O‘zbekiston Respublikasi Prezidenti Islom Karimov 25-avgust kuni Toshkent shahrida amalga oshirilayotgan qurilish va obodonlashtirish ishlari bilan tanishdi, deya xabar bermoqda O‘zA.
Prezident Islom Karimov g‘oyasi asosida ishlab chiqilgan Eski shaharni qayta qurishning bosh rejasiga muvofiq, mazkur hududni zamonaviy shaharga aylantirish bo‘yicha keng ko‘lamli bunyodkorlik ishlari olib borilmoqda. 2013-yili Xadra maydonida qurilish-ta’mirlash ishlari amalga oshirildi. 2014-yili Olmazor va Shayxontohur tumanlarida yangi yo‘llar qurildi. Joriy yilning may oyida Sebzor va Abdulla Qodiriy ko‘chalari kesishgan chorrahada yangi zamonaviy ko‘prik ochildi.
Bugungi kunda Nurafshon ko‘chasi bo‘yida ko‘p qavatli uy-joylar bunyod etilmoqda. Prezident yangi qurilgan mazkur turar-joy binolarini borib ko‘rdi.
Davlat rahbarining Toshkent shahrining Eski shahar qismida zamonaviy turar-joylar barpo etish chora-tadbirlari to‘g‘risidagi qaroriga asosan bu yerda 160 xonadondan iborat beshta besh qavatli uy qurib bitkazildi. Yil oxirigacha foydalanishga topshiriladigan 246 xonadonli yana o‘nta turar-joy qurilishi davom etmoqda.
Prezident bu yerda amalga oshirilgan ishlar bilan tanishar ekan, quruvchilarning mehnatiga yuqori baho berdi.
Izoh (0)