Janubiy Koreyada sobiq bosh vazirga nisbatan chiqarilgan ayblov hukmi o‘z kuchida qoldirildi

Koreya Respublikasi Oliy sudi mamlakatning sobiq bosh vaziri Xan Myon Suk yirik miqdorda pora olganligi uchun chiqarilgan ayblov hukmini o‘z kuchida qoldirdi. Bu haqda “RIA Novosti” xabar bermoqda.

Tergov manbalariga ko‘ra, sobiq bosh vazir 2007-yilda yirik qurilish kompaniyasi rahbaridan siyosiy xayriya sifatida 880 million von (760 ming dollar) olgan, ammo qonuniy tarzda rasmiylashtirmagan. Bu haqda ma’murlarga tadbirkorning o‘zi xabar bergan.

Avvaliga Seul okrug sudi dalillar yetarli bo‘lmagani sababli Xan Myon Sukni oqlagandi, ammo apellyatsiya sudi ishni qayta ko‘rib chiqishni talab qildi. Oxirgi so‘zni aytishi lozim bo‘lgan Oliy sud esa ayblovni qo‘llab-quvvatladi.

Xan Myon Suk 2006-2007-yillarda Janubiy Koreya hukumati rahbari lavozimini egallagan va bu mansabga tayinlangan ilk ayol bo‘lgandi.