To‘ylardagi dabdababozlikka ko‘pincha ayollar bosh-qosh bo‘ladi. Bu haqda Toshkent shahrining Yashnobod tumanidagi “Birlashgan” mahalla fuqarolar yig‘ini diniy ma’rifat va ma’naviy-axloqiy tarbiya masalalari bo‘yicha maslahatchisi Husniya Ro‘ziyeva ma’lum qildi.
“12news.uz” O‘zAga tayanib yozishicha, to‘ylardagi kimo‘zarga berilish kabi ma’naviyatimizga zid “odat”larga chek qo‘yish eng dolzarb masalalardan. Ma’lum bo‘lishicha, Birlashgan mahallasida xonadon egalari to‘y marosimlarining qaysi to‘yxonada o‘tishi, unga qancha odam taklif etilishi, qudalar o‘rtasidagi oldi-berdilarni mahalla faollari bilan bamaslahat hal qilarkan. Bu ortiqcha sarf-xarajatlarga yo‘l qo‘ymaslik, to‘ylarning ixcham, fayzli o‘tishiga xizmat qilmoqda.
– To‘ylardagi dabdababozlikka ko‘pincha ayollar bosh-qosh bo‘lishi hech kimga sir emas, – deydi mahalla fuqarolar yig‘inining diniy ma’rifat va ma’naviy-axloqiy tarbiya masalalari bo‘yicha maslahatchisi Husniya Ro‘ziyeva. – Ortiqcha hashamlarga berilish holatlarining oldini olish maqsadida mahalladagi obro‘li xonadon vakillari, nuroniylar bilan birga ayollar o‘rtasida tushuntirish ishlarini muntazam olib boramiz. Bu o‘z samaralarini berayotir. Ammo besh qo‘l baravar bo‘lmaganidek, ba’zan bir kunlik hoyu havas deb oyog‘i yerdan uzilayotgan, milliy qadriyatlarimizga bepisand qarayotganlar ham uchrab turadi. Bunday oilalarga ham ortiqcha dabdaba obro‘ keltirmasligini yotig‘i bilan tushuntirib, topilgan mablag‘i hisobidan boquvchisini yo‘qotgan keksalar, bemorlar, kam ta’minlangan oilalarga muruvvat ko‘rsatish eng katta savob ekanini yetkazmoqdamiz.
Izoh (0)