Тўйлардаги дабдабабозликка кўпинча аёллар бош-қош бўлади. Бу ҳақда Тошкент шаҳрининг Яшнобод туманидаги «Бирлашган» маҳалла фуқаролар йиғини диний маърифат ва маънавий-ахлоқий тарбия масалалари бўйича маслаҳатчиси Ҳусния Рўзиева маълум қилди.
«12news.uz» ЎзАга таяниб ёзишича, тўйлардаги кимўзарга берилиш каби маънавиятимизга зид «одат»ларга чек қўйиш энг долзарб масалалардан. Маълум бўлишича, Бирлашган маҳалласида хонадон эгалари тўй маросимларининг қайси тўйхонада ўтиши, унга қанча одам таклиф этилиши, қудалар ўртасидаги олди-бердиларни маҳалла фаоллари билан бамаслаҳат ҳал қиларкан. Бу ортиқча сарф-харажатларга йўл қўймаслик, тўйларнинг ихчам, файзли ўтишига хизмат қилмоқда.
– Тўйлардаги дабдабабозликка кўпинча аёллар бош-қош бўлиши ҳеч кимга сир эмас, – дейди маҳалла фуқаролар йиғинининг диний маърифат ва маънавий-ахлоқий тарбия масалалари бўйича маслаҳатчиси Ҳусния Рўзиева. – Ортиқча ҳашамларга берилиш ҳолатларининг олдини олиш мақсадида маҳалладаги обрўли хонадон вакиллари, нуронийлар билан бирга аёллар ўртасида тушунтириш ишларини мунтазам олиб борамиз. Бу ўз самараларини бераётир. Аммо беш қўл баравар бўлмаганидек, баъзан бир кунлик ҳою ҳавас деб оёғи ердан узилаётган, миллий қадриятларимизга беписанд қараётганлар ҳам учраб туради. Бундай оилаларга ҳам ортиқча дабдаба обрў келтирмаслигини ётиғи билан тушунтириб, топилган маблағи ҳисобидан боқувчисини йўқотган кексалар, беморлар, кам таъминланган оилаларга мурувват кўрсатиш энг катта савоб эканини етказмоқдамиз.
Изоҳ (0)