2015-yilning 27-iyul kuni Axborot texnologiyalari va kommunikatsiyalarini rivojlantirish vazirligi Hay’atining 2015-yilning I yarim yilligida axborot texnologiyalari va kommunikatsiyalarini rivojlantirish, joriy qilish bo‘yicha amalga oshirilgan ishlar sarhisobi, istiqboldagi vazifalarga bag‘ishlangan majlisi bo‘lib o‘tdi. Bu haqda Vazirlik matbuot xizmati xabar bermoqda.
Yig‘ilishda Vazirlikning rahbar va mas’ul xodimlari, hududiy boshqarma boshliqlari, axborot texnologiyalari va kommunikatsiyalari sohasida faoliyat yurituvchi aksiyadorlik kompaniyalari, korxonalar va tashkilotlar hamda ularning hududiy rahbarlari ishtirok etdi. Shuningdek, sohaning hududiy tashkilotlari xodimlari yig‘ilishni videokonferensiya shaklida kuzatib bordi.
Hay’at yig‘ilishida ta’kidlanganidek, 2015-yilning I yarim yilligi mobaynida axborot texnologiyalari va kommunikatsiyalarini rivojlantirish tizimida faoliyat ko‘rsatayotgan korxonalar tomonidan ko‘rsatilgan xizmatlar hajmi oldingi yilning shu davriga nisbatan 25,4 % ga oshib, 2,17 trillion so‘mni tashkil etmoqda. Jumladan, aholiga bu yo‘nalishda 1,5 trillion so‘mlik xizmatlar ko‘rsatilgan (o‘sish hajmi 23,5 %). Shuningdek, kompyuter dasturlari bilan bog‘liq 110,1 milliard so‘mlik xizmatlar ko‘rsatilgan (16,8 % ga oshgan).
Bugungi kunda xalqaro axborot tarmoqlaridan foydalanish umumiy tezligi yil boshiga nisbatan 30 % ga o‘sib, 21,25 Mbit/s ni tashkil qilmoqda. Operator va provayderlar uchun internet-xizmatlari (tashqi kanal) tarifi Xalqaro kommutatsiya markazi paketlari bilan birga yil boshi bilan solishtirganda 20,2 foizga, aniqrog‘i 1 Mbit/s uchun 206,97 AQSh dollarigacha, 2014-yilning shu davri bilan solishtirganda 32,5 % ga kamaytirildi.
O‘zbekiston miqyosida zamonaviy texnologiyalar asosida kengpolosali aloqani ta’minlovchi 1050 kilometrdan ortiq optik tolali aloqa liniyasi qurildi. Natijada ushbu tarmoq orqali mijozlarga videotelefoniya, internet-televideniye, yuqori tezlikdagi internet, HDTV-kanallar va boshqa xizmatlarni ko‘rsatish imkoni yaratildi.
O‘zbekiston hududlarining raqamli televideniye signallari bilan qamrovini kengaytirish yuzasidan ham bosqichma-bosqich ishlar amalga oshirilmoqda. Ayni vaqtda O‘zbekiston hududining 54 foizi qamrab olingan bo‘lsa, yil oxiriga qadar o‘rnatish nazarda tutilgan 19 ta raqamli teleuzatkichlar orqali bu ko‘rsatkichni 70 foizga yetkazish rejalashtirilgan.
“UZ” hududidagi domenlar soni bu davrda 21,86 mingtaga yetdi.
O‘zbekiston rahbarining iqtisodiyotning real sektorida axborot-kommunikatsiya texnologiyalarini yanada joriy qilish bo‘yicha qarorlariga muvofiq aksionerlik kompaniyalar, birlashmalar va yirik xo‘jalik korxonalarida axborot tizimlari va dasturiy mahsulotlarni joriy qilish bo‘yicha umumiy qiymati 336 milliard so‘m bo‘lgan 86 ta loyihalar amalga oshirilmoqda, shulardan umumiy qiymati 24 milliard so‘mga teng 41 ta loyihalar bo‘yicha ishlar yakuniga yetkazilgan.
Hay’at yig‘ilishida yil oxiriga qadar soha oldida turgan vazifalar belgilab olindi va muhokama qilingan barcha masalalar yuzasidan tegishli qarorlar qabul qilindi.
Izoh (0)