Odatda birgina nigoh tashlash bilan qarshingizdagi avtomobil orzularingiz ro‘yobimi yoki tushingizda ham sizni bosinqirashga majbur etadigan nusxami, farqlash unchalik qiyin emas. Keling, dunyo avtodizaynerlarining ensani qotiradigan ijod namunalarini eslab ko‘raylik. Bu borada bizga “Auto.tsn.ua” portali yordam beradi.
1. Pontiac Aztec
O‘tgan asrning 90-yillarida bir paytlari dong taratgan Pontiac'da ishlar orqaga keta boshladi. Bu holatdan faqat noodatiy, ovoza bo‘ladigan model ishlab chiqarishgina qutqarishi mumkin edi. Ushbu savdo belgisi egasi bo‘lgan GM konserni tavakkal qildi va Aztec krossoverini chiqarishga qo‘l urdi. Chindan ham mashina haqida hamma gapira boshladi, biroq afsuski, konsern kutgan ohanglarda emas. Aztec ishlab chiqarish besh yil davom etdi va 2005-yili konveyerdan olib tashlandi.
2. Lamborghini LM002
Italiyaning Lamborghini kompaniyasi o‘z faoliyatini traktor ishlab chiqarishdan boshlagan. 80-yillar o‘rtalarida kompaniya o‘zining birinchi (keyin ma’lum bo‘lganidek, oxirgi ham) yo‘ltanlamas avtomobilini ommaga taqdim etdi. Mahluqlarga o‘xshash qo‘rqinchli qiyofaga ega mashina bunday narslarga o‘ch arab shayxlarinigina qiziqtira oldi, xolos.
3. SsangYong Rodius
Janubiy Koreyaning SsangYong kompaniyasi dizayn borasidagi doimiy tajribalari bilan nom chiqargan. Rodius miniveni ularning orasida eng omadsizi bo‘lsa ajab emas. Na keng salon, na yurganda yaxshigina taassurot qoldirishi antiqa ko‘rinishi oqibatida hosil bo‘lgan salbiy tasavvurni o‘zgartira olmadi.
4. FIAT Multipla
90-yillar o‘rtalarida Italiya konserni 1956-yildan to 1969-yilgacha chiqarilgan olti o‘rinli, biroq ixchamgina oilaviy avto – Multipla’ni bozorga qaytarishga qaror qildi. Ammo mikrovenning noan’anaviy qiyofasi shuncha urinishni yo‘qqa chiqardi.
5. Reliant Robin
Janob Bin to‘g‘risidagi filmlar muxlislari Austin Mini minib olgan qahramonning uch g‘ildirakli antiqa avtomobil bilan muntazam tortishuvini yaxshi eslasa kerak. Bu mashina Reliant firmasiga tegishli – korxona dizayni bilan maqtanish amrimahol bo‘lgan uch g‘ildirakli ikkita modelga qo‘l urgan: Regal (aynan u mashhur serialda namoyon bo‘lgan) va Robin. Ikkala mashina o‘zlarida ishlab chiqarilgan oddiy buyumni ham ardoqlaydigan britaniyaliklar uchun latifalarning doimiy mavzusiga aylangan.
6. Citroen C4 Pallas
Xitoy avtodizayni olami ham o‘ziga xos: ba’zan ular nimani yomonroq amalga oshirishini ham tushunmay qolasan – o‘zlarining avtomobillarini ishlab chiqarishmi yoki xorij mashinalaridan nusxa ko‘chirish. Ikkinchi variantga yaqqol misol – xitoyliklar o‘zgartirgan Citroen C4.
7. Renault Clio Symbol
1999-yilda Renault kompaniyasi rivojlanayotgan mamlakatlar uchun arzon avtomobillar chiqarishni rejalashtirdi va uzoq o‘ylab o‘tirmay Clio xetchbekini sedanga aylantirib qo‘ya qoldi. Balki shu tufayli mashinaning yukxona qismi beo‘xshov chiqqandir. Qizig‘i, uchinchi dunyo davlatlari ushbu modelni aynan uncha-muncha yukni ko‘rdim demaydigan katta yukxonasi uchun yoqtirib qoldi.
8. Ford Edsel
Bir qarashda arzimasdek tuyulgan kichik unsur ham modelning qiyofasi, bozorda ketish-ketmasligini hal qilishi hech gap emas. Bu avtoda shunday qism sifatida radiator panjarasini ko‘rsatish mumkin.
9. Tatra T87
Chexiyalik Irji Ganzelka va Miroslav Zikmundning safarlari bahsli qiyofasi tufayli tarafdorlari bilan birga ashaddiy dushmanlariga ham ega bo‘lgan mashina dovrug‘ini dunyoga yoydi: 40-yillarda ular T87’da Afrikanining inson qadami yetmagan hududlarini ham kezib chiqdi.
10. Citroen 2CV
Bu model Ikkinchi jahon urushi endigina yakunlangan, mablag‘ taqchil bo‘lgan yillarda chiqarila boshlagan. Kichkina, tor, sodda va arzon. Odmigina qiyofasi uchun unga “irkit o‘rdakcha” degan laqab ham qo‘yishgandi.
Izoh (0)