2015-yilning 28—31-iyul kunlari Yaponiyaning Isuzu Motors va Itochu Corporation kompaniyalari prezidenti, janob Xosoi Susumi boshchiligidagi delegatsiya rasmiy tashrif bilan O‘zbekistonga keladi. Bu haqda “O‘zavtosanoat” axborot xizmatiga tayanib, “Telegraf.uz” xabar bermoqda.
Delegatsiya a’zolari O‘zbekistonga tashrifi davomida “O‘zavtosanoat” AK, xususan, Samarqand avtomobil zavodi faoliyati bilan yaqindan tanishish bilan birga o‘zaro hamkorlik aloqalarini yangi bosqichga ko‘tarishni ko‘zda tutgan.
Yaponiyaning Isuzu Motors kompaniyasi tijoriy transport vositalari va dizel dvigatellarini ishlab chiqarish bilan shug‘ullanuvchi dunyoning eng yirik kompaniyalaridan biri hisoblanadi.
Kompaniya zavodida 1918-yildan boshlab yuk avtomobillarini ishlab chiqarish yo‘lga qo‘yildi. 1936-yilda kompaniya Yaponiyadagi birinchi dizel dvigatelini ishlab chiqardi va hozirgi kunda shu xildagi motorlar uchun yangi texnologiyalarni yaratishda yetakchilardan biri hisoblanadi.
Ma’lumot uchun: Tijoriy faoliyatini 1999-yilning mart oyida boshlagan Samarqand avtomobil zavodi 2006-yilda Yaponiyaning Isuzu Motors Ltd kompaniyasi bilan hamkorlikni yo‘lga qo‘ygan. 2007-yilning yanvar oyidan boshlab SamAuto zavodining ishlab chiqarish quvvatlarida Isuzu shassisi asosida harakatlanuvchi tijoriy avtomobillarni ishlab chiqarish yo‘lga qo‘yilgan.
Izoh (0)