Meksika fuqaro muhofazasi kuchlari qayta uyg‘ongan Kolima vulqoni yaqinidagi hududlardan o‘nlab aholini xavfsiz hududga ko‘chirishga majbur bo‘ldi. “TASS”ning xabar berishicha, Kolima shtatidagi Beserra tumanidan 81 kishi olib chiqilgan.
11-iyulga o‘tar kechasi vulqon kul otgan va undan chiqqan lava 2,5 kilometr masofagacha oqib borgan. Vayronagarchiliklar va jabrlanuvchilar haqida axborot kelib tushmagan. Vulqon yaqinidagi hududni qoplagan kul qatlamining qalinligi ba’zi joylarda 5 santimetrgacha yetgan.
Fuqaro muhofazasi kuchlari milliy muvofiqlashtiruvchisi Luis Felipe Puentening so‘zlariga ko‘ra, Kolima vulqoni 2005-yildan beri birinchi marta bu qadar kuchli otildi.
Mahalliy ma’muriyat fuqarolarni ehtiyot choralarini ko‘rishga, nafas olish organlarini kuldan saqlashga, uydagi barcha deraza va eshiklarni yopishga, shuningdek, vulqonga 5 kilometrdan ortiq yaqinlashmaslikka chaqirdi.
Mamlakat Ichki ishlar vazirligi huzuridagi fuqaro muhofazasi muvofiqlashtiruvchi qo‘mitasi vakillari vulqonning faolligini muntazam kuzatib bormoqda va, zarurat tug‘ilsa, keng miqyosli evakuatsiyani tashkil etishga tayyor.
Izoh (0)