Мексика фуқаро муҳофазаси кучлари қайта уйғонган Колима вулқони яқинидаги ҳудудлардан ўнлаб аҳолини хавфсиз ҳудудга кўчиришга мажбур бўлди. «ТАСС»нинг хабар беришича, Колима штатидаги Бесерра туманидан 81 киши олиб чиқилган.
11 июлга ўтар кечаси вулқон кул отган ва ундан чиққан лава 2,5 километр масофагача оқиб борган. Вайронагарчиликлар ва жабрланувчилар ҳақида ахборот келиб тушмаган. Вулқон яқинидаги ҳудудни қоплаган кул қатламининг қалинлиги баъзи жойларда 5 сантиметргача етган.
Фуқаро муҳофазаси кучлари миллий мувофиқлаштирувчиси Луис Фелипе Пуэнтенинг сўзларига кўра, Колима вулқони 2005 йилдан бери биринчи марта бу қадар кучли отилди.
Маҳаллий маъмурият фуқароларни эҳтиёт чораларини кўришга, нафас олиш органларини кулдан сақлашга, уйдаги барча дераза ва эшикларни ёпишга, шунингдек, вулқонга 5 километрдан ортиқ яқинлашмасликка чақирди.
Мамлакат Ички ишлар вазирлиги ҳузуридаги фуқаро муҳофазаси мувофиқлаштирувчи қўмитаси вакиллари вулқоннинг фаоллигини мунтазам кузатиб бормоқда ва, зарурат туғилса, кенг миқёсли эвакуацияни ташкил этишга тайёр.
Изоҳ (0)