O‘zbekiston futbol federatsiyasi Ijroiya qo‘mitasining navbatdagi majlisida tashkilotning bir qator xodimlariga nisbatan hayfsan e’lon qilindi. Bu haqda O‘FF matbuot xizmati xabar bermoqda.
Majlisda O‘zbekiston Futbol Federatsiyasining Bosh kotibi Sardor Rahmatullayev, O‘zbekiston Professional Futbol ligasining bosh direktori Farhod Magametov, O‘zbekiston Futbol Federatsiyasi matbuot kotibi Sanjar Rizayevlarga hayfsan e’lon qilindi. Terma jamoalar markazi direktori Asqar Tolibjonov, O‘zbekiston terma jamoalarining texnik direktori Rustam Akramovlar esa Usmonovdan va Ijroqo‘m a’zolaridan oxirgi hayfsan oldi. Milliy terma va olimpiya terma jamoalarining oldiga qo‘yilgan vazifa bajarilmagan taqdirda Asqar Tolibjonov va Rustam Akramov o‘z vazifasidan ozod etilishi ma’lumot sifatida qabul qilindi.
Shu bilan birga O‘zbekiston milliy terma jamoasining 2015-yildagi rasmiy o‘yinlardagi, shuningdek, Osiyo chempionati hamda Jahon chempionatining birlashgan saralash turniridagi ishtiroki o‘ta qoniqarsiz deb baholandi.
“Milliy terma jamoaning oxirgi o‘yinlari biz noto‘g‘ri yo‘ldan ketayotganimizni, to‘g‘ri ishlamayotganligimizni amalda ko‘rsatib berdi. Osiyo chempionatida Saudiya Arabistonini omadimiz kelib yutdik va shuning evaziga guruhdan chiqdik. Keyingi o‘yinlarda g‘alaba qozona olmadik. Oxirgisi, ayniqsa, 2:4 hisobidagi Shimoliy Koreyaga uchralgan mag‘lubiyat o‘tib tushdi. Atrofimdagi aksariyat ‘mutaxassislar’ bu o‘yindagi mag‘lubiyatga turli sabablarni keltirishyapti, sun’iy qoplamali maydon, falonchi va hokazo. Bular haqida siz barchangiz mag‘lubiyatgacha juda yaxshi bilardingiz”, — dedi O‘FF prezidenti Mirabror Usmonov.
Federatsiya prezidenti keyingi bosqich uchun yo‘llanmani qo‘lga kiritishda asosiy raqobatchi hisoblangan Shimoliy Koreya, qolaversa, Filippin terma jamoasining 6 ochkoga oldinga o‘tib ketganligi haqida gapirarkan jumladan, shunday dedi: “Guruhda birinchi o‘rinni egallagan jamoalar keyingi bosqichga chiqadi. Ikkinchi o‘rindan chiqish uchun eng yaxshi ko‘rsatkichni qayd etgan 4 jamoadan biri bo‘lish kerak. Milliy terma jamoada esa hozir to‘plar nisbati minus ikki. Peshqadamlarda allaqachon 6 ochko, bizda esa 0. Yana menga aytishadiki, hali 7 ta o‘yin bor, vahima qilmang. Nima ertaga yana yutqizsak, yana 6 ta o‘yin bor deb gapirasizmi?”
Majlis yakunida terma jamoalar markazi direktori Asqar Tolibjonov va texnik direktor Rustam Akramov ish shu darajada davom etib, terma jamoalar oldiga qo‘yilgan vazifalar bajarilmasa, futboldan butun umrga chetlatilishi mumkinligi aytib o‘tildi.
Izoh (0)