Barcha yuridik rasmiyatchiliklar yakuniga yetkazilsa, Qozog‘iston 2015-yil oxiridayoq Jahon savdo tashkiloti (JST)ning to‘la huquqli a’zosiga aylanishi mumkin. Bu haqda JST vakili Melissa Begagga tayanib, “Vedomosti” xabar berdi.
Ostona JSTga a’zo bo‘lish haqidagi arizani 1996-yil 29-yanvarda bergan edi. 10-iyun kuni mamlakatning tashkilotga qo‘shilish shartlari haqidagi muzokaralar yakunlandi. Qozog‘istonning JSTga a’zo bo‘lishi bo‘yicha hujjatlar paketi loyihasi tashkilot ishchi guruhiga rasman tasdiqlash uchun 22-iyun kuni topshirilishi kerak edi.
“Agar barchasi rejalashtirilganidek ketsa, unda ular yil oxiriga kelib, rasman JST a’zosiga aylanishi mumkin”, — dedi Begag 22-iyundagi majlisda ishchi guruhning barcha 52 a’zosi hujjatlar paketini ma’qullaganini aytar ekan.
Qozog‘istonga 31-oktabr kuni hujjatlarning ichki ratifikatsiyasini o‘tkazish tavsiya etildi. Ratifikatsiyadan 30 kun o‘tib esa, u rasman JSTning a’zosiga aylanishi mumkin.
Izoh (0)