Putin Rossiya armiyasi 40ta yangi qit’alararo ballistik raketalarga ega bo‘lishini ma’lum qildi

Rossiya qurolli kuchlariga 2015-yilda 40ta qit’alararo ballistik raketalar yetkazib beriladi. RBC.ru’ning xabar berishicha, bu haqda “Armiya-2015” xalqaro harbiy-texnikaviy forum ochilishida Rossiya prezidenti Vladimir Putin ma’lum qildi.

“Joriy yilda yadroviy kuchlar tarkibini 40ta nisbatan yangi qit’alararo ballistik raketalar to‘ldiradi, ular istalgan, hatto texnik jihatdan eng mukammal havo hujumidan mudofaa tizimlarini ham yo‘q qila oladi”, - dedi Putin.

Rossiya yetakchisining qayd etishicha, forumda namoyish etilayotgan harbiy robotlarning namunalari va boshqaruv tizimlari ko‘p jihatdan Rossiya armiyasi kelajagini belgilaydi. Putin 2020-yilga borib Rossiya armiyasidagi zamonaviy qurol-aslahalar ulushi 70-100 foizga yetishiga umid bildirdi.

O‘tgan hafta The New York Times gazetasi Pentagon Sharqiy Yevropaning bir qator mamlakatlari, xususan, Polsha, Estoniya, Litva, Latviya, Vengriyaga og‘ir qurol-aslaha, jumladan, tanklarni joylashtirishni rejalashtirayotgani haqida xabar bergandi. Iyun oyi boshida esa Associated Press agentligi Barak Obama ma’muriyati Yevropa va Osiyo mamlakatlariga raketalarni joylashtirish masalasini o‘rganib chiqayotganini ma’lum qilgandi.