O‘zbek Milliy akademik drama teatrida O‘zbekiston mustaqilligining 24 yilligiga bag‘ishlab O‘zbekiston Respublikasi Madaniyat va sport ishlari vazirligi, “O‘zbekteatr” ijodiy-ishlab chiqarish birlashmasi, Teatr ijodkorlari uyushmasi hamkorligida o‘tkazilgan O‘zbekiston teatrlarining “Seni kuylaymiz, zamondosh!” III respublika ko‘rik-festivali g‘olib va sovrindorlarini taqdirlashga bag‘ishlangan tadbir bo‘lib o‘tdi, deb xabar beradi O‘zA.
Besh kun davom etgan festival jarayonida yangi sahna asarlari teatr san’ati muxlislari e’tiboriga havola etildi. Ularning postanovka jarayoni, aktyorlarning ijro uslubi, rejissyor mahorati teatrshunoslar, olimlar, dramaturglar, yozuvchi va shoirlardan iborat nufuzli hakamlar hay’ati tomonidan muhokama etildi. Ko‘rik-festival doirasida o‘tkazilgan “Sahnada zamondosh obrazi” mavzusidagi ilmiy-amaliy konferensiyada davr bilan hamnafas yashayotgan, fidoyi insonlar siymosini sahnaga olib chiqishning dolzarb masalalari, istiqboldagi vazifalar atroflicha muhokama etildi.
Qashqadaryo viloyati musiqali drama teatrining “Orol bobo” spektakli birinchi o‘ringa sazovor bo‘ldi. Ikkinchi o‘rin Buxoro viloyati musiqali drama teatrining “Burch” spektakliga berildi. Qoraqalpog‘iston davlat yosh tomoshabinlar teatrining “Tomir” hamda Muqimiy nomidagi o‘zbek davlat musiqali teatrining “Quvonch” spektakli uchinchi o‘ringa loyiq topildi.
G‘olib va sovrindorlarga diplom va sovg‘alar topshirildi.
Izoh (0)