Germaniyaning Knauf kompaniyasi o‘zining Buxoro viloyatidagi ikkita zavodida 52,5 million dollarlik yangi loyihalarni amalga oshiradi, deb xabar beradi UzDaily.
O‘zbekiston prezidentining “O‘zbekiston Respublikasi va Germaniya Federativ Respublikasi o‘rtasida iqtisodiy hamkorlikni kengaytirish chora-tadbirlari to‘g‘risida”gi qarori asosida joriy yilda nemis kompaniyasi va “O‘zqurilishmateriallar” AK o‘rtasida kelishuv imzolandi.
“Tomonlar Knauf’ning Buxoro viloyatidagi zavodlarida quruq qurilish qorishmalarini ishlab chiqaruvchi yangi quvvatlar va qoplama (gipsokarton) listlarining qo‘shimcha liniyalarini qurishni nazarda tutgan kelishuvni imzoladi. Ular yiliga 120 ming tonna quruq qorishma va 8 million kvadrat metr gipsokarton ishlab chiqarishga imkon beradi”, — dedi “O‘zqurilishmateriallar” iqtisodiy tahlil boshqarmasi boshlig‘i O‘tkir Turdiyev.
Knauf hozirgacha 60 million dollardan ortiq investitsiyani O‘zbekistonga kiritgan. Buxoro viloyatida kompaniyaning ikkita korxonasi – quruq qurilish qorishmalarini ishlab chiqaradigan “Buxorogips” AJ QK va gipsokarton listlari ishlab chiqaradigan “Knauf Gips Buxoro” MChJ XK faoliyat yuritadi.
Birinchi korxona 2009-yil avgustida quruq qorishmalarni ishlab chiqarishni boshlagan. U yiliga 50 ming tonna mahsulot ishlab chiqarish quvvatiga ega. 2011-yil Kogonda yiliga 20 million metr kvadrat gipsokarton ishlab chiqarish quvvatiga ega gipsokarton zavodi qurildi.
Izoh (0)