Германиянинг Knauf компанияси ўзининг Бухоро вилоятидаги иккита заводида 52,5 миллион долларлик янги лойиҳаларни амалга оширади, деб хабар беради UzDaily.
Ўзбекистон президентининг «Ўзбекистон Республикаси ва Германия Федератив Республикаси ўртасида иқтисодий ҳамкорликни кенгайтириш чора-тадбирлари тўғрисида»ги қарори асосида жорий йилда немис компанияси ва «Ўзқурилишматериаллар» АК ўртасида келишув имзоланди.
«Томонлар Knauf’нинг Бухоро вилоятидаги заводларида қуруқ қурилиш қоришмаларини ишлаб чиқарувчи янги қувватлар ва қоплама (гипсокартон) листларининг қўшимча линияларини қуришни назарда тутган келишувни имзолади. Улар йилига 120 минг тонна қуруқ қоришма ва 8 миллион квадрат метр гипсокартон ишлаб чиқаришга имкон беради», — деди «Ўзқурилишматериаллар» иқтисодий таҳлил бошқармаси бошлиғи Ўткир Турдиев.
Knauf ҳозиргача 60 миллион доллардан ортиқ инвестицияни Ўзбекистонга киритган. Бухоро вилоятида компаниянинг иккита корхонаси – қуруқ қурилиш қоришмаларини ишлаб чиқарадиган «Бухорогипс» АЖ ҚК ва гипсокартон листлари ишлаб чиқарадиган «Кнауф Гипс Бухоро» МЧЖ ХК фаолият юритади.
Биринчи корхона 2009 йил августида қуруқ қоришмаларни ишлаб чиқаришни бошлаган. У йилига 50 минг тонна маҳсулот ишлаб чиқариш қувватига эга. 2011 йил Когонда йилига 20 миллион метр квадрат гипсокартон ишлаб чиқариш қувватига эга гипсокартон заводи қурилди.
Изоҳ (0)