Andijonda yangi, besh yulduzli “Bog‘ishamol” mehmonxonasi foydalanishga topshirildi. Telegraf.uz’ning qayd etishicha, zamonaviy mehmonxona majmuasi besh yulduzli darajada xizmat ko‘rsatuvchi mintaqadagi ilk otel hisoblanadi.

Tomida yozgi qahvaxona joylashgan to‘rt qavatli bino sharqona saroyni yodga soladi. Mehmonxonaning barcha xonalari “lyuks” toifaga oid bo‘lib, mehmonlarga turli biznes-xizmatlar: haydovchisi bilan birga avtomobil, ishlash uchun xona, maishiy texnika, muzokaralar zali, konferens-zal taklif qilinadi.

Mehmonxonada Wi-Fi ishlaydi, sensorli va tejamkor yoritish uskunalari o‘rnatilgan. Undagi ikki restoran va nomerlarning vannaxonasiga yetkazib beriladigan suv uch bosqichli tozalash tizimidan o‘tib boradi.

Otelda sauna, basseyn, fitnes-klub mavjud. Shuningdek, mehmonlar uchun shifobaxsh buloqlar, hunarmandlar shaharchasi, tarixiy obidalar, yodgorliklar, “Bog‘ishamol” va “Shirmonbuloq” dam olish zonalariga sayohatlar tashkil etiladi.

Mehmonxona bosh menejeri Ilhomjon Azimovning so‘zlariga ko‘ra, majmua haqidagi axborot xalqaro sayyohlik saytiga joylashtirilgan va “boshqa qit’ada yashovchi inson ham qiyinchiliksiz”, internet orqali xonalarni band qilishi mumkin.

Uning qayd etishicha, mehmonxona xodimlari tanlov asosida ishga qabul qilingan bo‘lib, ular xorijiy tillarni biladi va boy tajribaga ega. “Texnik xodimlar Toshkent mehmonxonalarining birida mahorat oshirgan”, - deydi bosh menejer.