109 nafar Ikkinchi jahon urushi qatnashchisiga O‘zbekistonda ishlab chiqarilgan televizorlar sovg‘a qilindi

Toshkentda “Mahalla” xayriya jamoat fondi respublika boshqaruvining 2015-yil birinchi chorak faoliyati yakunlariga bag‘ishlangan yig‘ilishi bo‘lib o‘tdi, deb xabar bermoqda “Uz24.uz”.

Fondning respublika boshqaruvi raisi A. Ahmedovning so‘zlariga ko‘ra, respublika bo‘yicha 109 nafar Ikkinchi jahon urushi qatnashchisiga mamlakatimizda ishlab chiqarilgan zamonaviy televizorlar hadya qilindi.

Shuningdek, Saxovat va Muruvvat uylarida yashovchi keksa va nogironlarning har biriga 147 million so‘mlik mavsumiy kiyim-bosh, ko‘rpa-to‘shak jildlari jamlanmasi va shaxsiy gigiyena vositalari yetkazib berildi.

11 ming nafardan ortiq urush va mehnat fronti faxriysi, yolg‘iz keksalar, pensioner va nogironlarning 299 ming 560 m2 uy-joylari ta’mirlab berildi.“Hech kim mehr va e’tibordan chetda qolmasin” shiori ostida 1230 nafar urush va mehnat fronti faxriysi, pensioner va nogironlarga uy-ro‘zg‘or buyumlari olib berildi. Shuningdek, 62 nafar jismoniy imkoniyati cheklangan va boquvchisini yo‘qotgan talabaning o‘quv-shartnoma pullari to‘lab berildi.

Keksalarni e’zozlash yilida yolg‘iz qariyalar, nogiron va muhtoj fuqarolarni ijtimoiy himoyalash ko‘lami yanada kengaydi. O‘tgan davr mobaynida 76 nafar fuqaroga maxsus aravacha, 92 nafariga qo‘ltiqtayoq, 82 nafariga eshitish moslamasi, 133 tasiga hassa va ortopediya mahsulotlari olib berildi.

Hisobot davrida 523 nafar kishi tarixiy obidalar va muzeylarga, 1112 nafari teatr va konsert tomoshalariga, 500 nafari esa madaniy-ma’naviy tadbirlarga jalb etildi.

“Keksalarni e’zozlash yili” Davlat dasturi hamda “Mahalla” xayriya jamoat fondi Ish rejasida belgilangan tadbirlar ijrosini ta’minlash maqsadida Fond hisobidan jami 2 milliard 515 million so‘mdan ziyod mablag‘ ajratildi, deb xabar qiladi “Mahalla” gazetasi.