“O‘zbekenergo” davlat-aksiyadorlik kompaniyasi 2016-2018-yillarda Sirdaryo viloyati quvvati 900 megavattga teng yangi issiqlik elektr stansiyasini qurishni rejalashtirmoqda. Loyihasi 2015-yilda ishlab chiqilishi boshlangan stansiya har birining quvvati 450 megavattga teng bo‘lgan ikkita bug‘-gaz qurilmasini o‘z ichiga oladi, deya xabar bermoqda “Gazeta.uz”.
Loyihaning dastlabki qiymati 910 million dollarga teng bo‘lib, uning 500 million dollarini xorijiy qarz mablag‘lar tashkil etadi. Yangi IES qurilishi “O‘zbekenergo”ning 2015-2019-yillarga mo‘ljallangan mamlakat elektr energetika sohasini rivojlantirish strategiyasi doirasida amalga oshiriladi.
Hozirgi vaqtda viloyatda Markaziy Osiyodagi eng yirik – Sirdaryo issiqlik elektr stansiyasi faoliyat ko‘rsatmoqda. U 1981-yilda ishga tushirilgan bo‘lib, har birining quvvati 300 megavattga teng bo‘lgan 10ta energoblokdan iborat (umumiy quvvati – 3000 megavatt). Stansiya har yili respublikaning yagona energetika tizimiga 13 milliard kilovatt-soat yoki O‘zbekistonda ishlab chiqarilayotgan elektr energiyaning 32 foizini beradi.
2014-yil dekabrida Rossiyaning “Siloviye mashini” kompaniyasi Sirdaryo IESni modernizatsiya qilishni yakunladi. Loyiha doirasida har birining quvvati 300 megavatt bo‘lgan ikkita energoblok rekonstruksiya qilindi, natijada stansiya quvvati 50 megavattga oshdi. Umumiy qiymati 60,2 million dollar bo‘lgan ushbu loyiha O‘zbekiston Tiklanish va taraqqiyot jamg‘armasining krediti va “O‘zbekenergo”ning o‘z mablag‘lari hisobidan moliyalashtirildi.
“O‘zbekenergo” 2013-yil avgustida umumiy qiymati 1,1 milliard dollarga teng bo‘lgan Namangan viloyatidagi To‘raqo‘rg‘on IESda umumiiy qurilish ishlarini boshlagan edi. Umumiy quvvati 900 megavattga teng va yiliga 7 milliard kilovatt-soat elektr energiya stansiya 2017-yilda to‘liq qurib bitkazilishi kerak.
Ma’lumot uchun, hozirgi vaqtda O‘zbekiston energotizimida umumiy quvvati 12,4 ming megavatt bo‘lgan 45ta elektrstansiya ishlab turibdi. Mamlakatdagi stansiyalarning elektr energiya ishlab chiqarish salohiyati bir-yilda 56-57 milliard kilovatt-soatni tashkil etadi.
Izoh (0)