Toshkent shahri aholisi uchun sovuq suv xizmatining yangi tariflari e’lon qilindi

Toshkent shahrida 15 maydan sovuq suv ta’minoti xizmati uchun yangilangan tariflar joriy etiladi. “Gazeta.uz”ning “Suvsoz” korxonasiga asoslanib xabar berishicha, tariflarning qimmatlashuvi elektr energiya va boshqa resurslar narxining qimmatlashuvi bilan bog‘liq.

Ko‘p qavatli turar-joy binolarini suv bilan ta’minlash xizmati uchun yangi tariflar, to‘lovlar hisoblagichga asosan amalga oshirilsa – 1 metr kub suv uchun joriy 310 so‘mdan 342 so‘mga (hisoblagichsiz uylarda – bir kishi uchun bir oyga 3814,25 so‘mdan 4185,64 so‘mga) oshiriladi.

Xususiy sektordagi uylarning egalari uchun hisoblagich bo‘yicha 1 metr kub suv narxi, kanalizatsiya bo‘lgan taqdirda, 246 so‘m (hozirda – 225 so‘m), kanalizatsiya bo‘lmasa – 150 so‘m (140) etib belgilangan. Hisoblagich bo‘lmasa, tarif miqdori bir kishi uchun bir oyga 3798,1 so‘m (3490,46), kanalizatsiyasi bo‘lmagan uylarda – bir kishi uchun 335,34 so‘mga teng.

Eslatib o‘tamiz, hisoblash uskunalari bo‘lmagan holatlarda sovuq suv xizmati bo‘yicha to‘lovlar belgilangan tariflarga oshib boruvchi 1,5 koeffitsiyentni tatbiq etish bilan amalga oshiriladi.

Toshkent shahrida 15 maydan issiq suv ta’minoti va isitish tizimi xizmati tariflari ham qimmatlashadi.