O‘zbekistonga tashrif bilan kelgan BMT Iqtisodiy va ijtimoiy masalalar departamentining elektron hukumat bo‘yicha mintaqalararo katta maslahatchisi Richard Kerbi o‘zbekistonlik jurnalistlar bilan uchrashdi.
“Elektron hukumat” tizimini rivojlantirish markazi matbuot xizmatidan ma’lum qilishlaricha, u o‘zbekistonlik jurnalistlarning O‘zbekistonda elektron hukumatning rivojlanishiga doir savollariga javob berdi.
Kerbining so‘zlariga ko‘ra, O‘zbekiston ochiq ma’lumotlar portali – data.gov.uz’ni yanada kuchaytirish, unda yanada ko‘proq axborot berish kerak. “O‘zbekistonga birinchi marta 2013-yilda kelgandim, u vaqtda ochiq ma’lumotlar portali yo‘q edi, biroq bugun ko‘ryapmanki, katta o‘zgarishlar bor. Ikki yildan so‘ng yanada ko‘proq va kattaroq o‘zgarishlar bo‘ladi, deb o‘ylayman”, - dedi ekspert.
BMT vakilining so‘zlariga ko‘ra, elektron hukumat davlat organlari bilan an’anaviy muloqot – xat orqali yoki bevosita og‘zaki murojaat qilish kabi ko‘rinishlarini inkor etmaydi, aksincha, fuqarolarga ko‘rsatilayotgan davlat xizmatlarining qulayligi va tezkorligini oshirishga yordam beradi, bunda fuqarolarda “ajoyib tanlov imkoniyati” paydo bo‘ladi.
“Elektron hukumat rivojida OAVning o‘rni juda ham katta, jurnalistlar O‘zbekistonda elektron hukumat rivoji jarayonida yuz berayotgan voqea-hodisalar haqida aholini xabardor qilishlari kerak. Fuqarolar bu jarayonlarning qatnashchisi bo‘lib, Yagona portal, ochiq ma’lumotlar portali va boshqa resurslarning faoliyati yaxshilanishida ishtirok etishlari, takliflar bilan chiqishlari kerak”, - dedi Richard Kerbi.
BMT tizimida 1984-yildan beri ishlab kelayotgan Richard Kerbi 20 yildan beri Afrika, Osiyo, Karib havzasi, Yevropa, Yaqin Sharq va Lotin Amerikasi mamlakatlari hukumatlariga elektron hukumatni rivojlantirishga doir maslahatlar berib keladi.
Izoh (0)