BMT Iqtisodiy va ijtimoiy masalalar departamenti (BMT-IIMD)ning xalqaro ekspertlari Richard Kyorbi va Vyacheslav Cherkasov 27-aprel – 1-may kunlari tashrif bilan O‘zbekistonda bo‘ladi. Bu haqda “Gazeta.uz” xabar bermoqda.
“Elektron hukumat” tizimini rivojlantirish markazi matbuot xizmatidan ma’lum qilishlaricha, BMT-IIMD vakillari elektron hukumat sohasidagi yangi tendensiya va innovatsiyalarni, shuningdek, uni rivojlantirish bilan bog‘liq muammolarni muhokama qilish maqsadida O‘zbekistonning muhim vazirlik va idoralari rahbarlari bilan uchrashuvlar o‘tkazadi.
Bundan tashqari, ekspertlar xalqaro tajriba bilan o‘rtoqlashish maqsadida davlat xizmatchilari uchun bir qator seminarlar ham o‘tkazishadi.
Dushanba kuni O‘zbekiston Axborot texnologiyalari va kommunikatsiyalarni rivojlantirish vazirligida bo‘lib o‘tadigan uchrashuvda ekspertlar elektron hukumat bo‘yicha 2016-yilga mo‘ljallangan BMT sharhining yangi tahriri taqdimotini o‘tkazishadi. Bir ikki marta e’lon qilinadigan bu sharh 193 mamlakatning elektron hukumat sohasidagi rivojlanishini hisoblab, ko‘rsatadi.
29-aprel kuni bo‘lib o‘tadigan seminarda esa ishtirokchilar elektron hukumatga tayyorlikni tekshiruvchi tahliliy vosita – METER bilan tanishishadi. Ushbu metodika davlat hokimiyati va boshqaruvi organlari ishiga axborot-kommunikatsiya texnologiyalarini muvaffaqiyatli joriy etish bo‘yicha muhim faoliyat yo‘nalishlarini belgilab olishga yordam beradi.
30-aprelga mo‘ljallangan boshqa bir seminarda METER boshqaruvi jarayonida jamoatchilikning ishtirokini baholashga imkon beradigan tahliliy vosita taqdimoti o‘tkaziladi. Bu vosita davlat organlari tomonidan qarorlarni qabul qilish jarayoniga fuqarolarni jalb etishda yordam ko‘rsatishga qaratilgan.
Richarb Kyorbi va Vyacheslav Cherkasov elektron hukumat va davlat boshqaruvi bo‘yicha katta maslahatchilar bo‘lib, elektron hukumatni rivojlantirish masalalari bo‘yicha turli mamlakatlarning hukumatlari bilan maslahatlashuvlar o‘tkazish bo‘yicha boy tajribaga ega.
Ekspertlarning tashrifi BMT Taraqqiyot dasturining “Davlat xizmatlari ko‘rsatish sifatini yaxshilash uchun elektron hukumatni targ‘ib qilish” loyihasi, Axborot texnologiyalari va kommunikatsiyalarni rivojlantirish vazirligi va “Elektron hukumat” tizimini rivojlantirish markazi tomonidan tashkil etilgan.
Izoh (0)