O‘zbekistonda 1-maydan uy-joy-kommunal (UJK) xizmatlar haqini to‘lash bo‘yicha eng kam ish haqining tabaqalashtirilgan miqdorida har oyda kompensatsiya pul to‘lovlari beriladigan shaxslar imtiyozli toifalarining yangi ro‘yxati amal qilishni boshlaydi. Bu O‘zbekiston Prezidentining 14-apreldagi farmonida belgilab qo‘yilgan, deya xabar bermoqda “Gazeta.uz”.
1941-1945-yillardagi urush nogironlari va qatnashchilari endi eng kam ish haqining 50 foizi (ayni vaqtdagi 45 foiz o‘rniga), urushning mehnat fronti qatnashchilari esa 25 foizi (18 foiz) miqdorida to‘lov puli olishadi. Ushbu o‘zgarishlar “Keksalarni e’zozlash-yili” Davlat dasturiga muvofiq kiritildi.
1941-1945-yillardagi urush nogironlari va qatnashchilariga tenglashtirilgan shaxslar, o‘zgalar parvarishiga muhtoj yolg‘iz pensionerlar, Sovet Ittifoqi Qahramonlari, Sotsialistik Mehnat qahramonlari va “Slava” ordenining uchala darajasi bilan mukofotlangan shaxslar, fashist konslagerlarining sobiq voyaga yetmagan mahbuslari, Leningrad shahri qamali davrida ishlagan fuqarolar, ko‘rish qobiliyati bo‘yicha I guruh nogironlari, Chernobil halokati oqibatida jabrlangan fuqarolar, yadro poligonlari va boshqa radiatsiya-yadro obyektlarida harbiy xizmatni o‘tagan pensiya yoshidagi shaxslarga beriladigan to‘lovlar miqdori 45 foiz darajasida saqlab qolingan.
Eslatib o‘tamiz, aynan shu farmonga muvofiq, yoshi 75ga to‘lgan va undan oshgan fuqarolardan ularga tayinlangan pensiya va nafaqalarning hisoblanishi, shuningdek, qonunchilikda ko‘zda tutilgan imtiyozlarning qo‘llanilishi to‘g‘riligini tekshirish natijalariga ko‘ra aniqlangan ortiq to‘langan pensiya va nafaqalar miqdorida 2015-yil davomida hisobdan chiqarilishi, shuningdek, yoshi 100ga to‘lgan va undan oshgan fuqarolar pensiyasiga 2015-yil 1-mayidan boshlab har oyda eng kam ish haqining 100 foizi miqdorida qo‘shimcha to‘lov to‘lash ham belgilangan edi.
Izoh (0)