Janubiy Koreya prezidenti bosh vazirning iste’fo haqidagi iltimosini qabul qildi

Janubiy Koreya prezidenti Pak Kin Xe mamlakat bosh vaziri Li Van Guning iste’foga chiqish haqidagi iltimosini qabul qildi. “RIA Novosti” xabariga ko‘ra, korrupsiya mojarosi ortidan bosh vazir o‘tgan hafta iste’fo haqida ariza topshirgandi.

“Menga ma’lum bo‘lgani, prezident Pak Kin Xe bosh vazir Li Van Guning iste’fo haqidagi iltimosini rasman qabul qilgan”, - dedi hukmron “Senuri” partiyasidagi ismi oshkor etilmagan manba.

Janubiy Koreya bosh vaziri Li Van Guning iste’foga chiqish haqidagi iltimosi 20-aprel kuni prezident devoniga taqdim etilgan edi. Li Van Gu bosh vazir lavozimiga 2015-yilning 16-fevralida tasdiqlangan edi.

Aprel oyi boshida, qurilish kompaniyasi rahbari Son Van Chjon o‘z joniga qasd qilganidan so‘ng, Janubiy Koreyada navbatdagi yirik korrupsion mojaro boshlandi.

Tergov davomida marhumning xati topilgan, unda prezident Pak Kin Xe ma’muriyatidagi qurilish kompaniyasi rahbaridan pora olgan amaldorlarning ism-shariflari yozilgan.

Xususan, xatda qayd etilishicha, bosh vazir Li Van Gu 2013-yili Son Van Chjonda 30 million von (taxminan 28 ming dollar) miqdorida pora olgan. Siyosiy arbobning o‘zi ushbu ayblovni rad etmoqda.