Ko‘pchilik sut mahsulotlarini, xususan, yogurtlar (qatiq)ni muntazam iste’mol qilish inson salomatligini mustahkamlaydi, deb hisoblaydi. Biroq Madrid avtonom universiteti olimlari bu fikrga qarshi chiqishdi, deya xabar bermoqda “Segodnya.ua”.
Universitet olimlarining bunday xulosaga kelishiga sabab bo‘lgan tadqiqotda 4 mingdan ortiq ko‘ngilli ishtirok etdi. Unda muntazam yogurt iste’moli va salomatlik bilan bog‘liq hayot sifati o‘rtasidagi munosabat tahlil qilib chiqildi.
Olimlar 3,5 yil davomida tadqiqot ishtirokchilarining hayot sifati qay darajada o‘zgarayotganini kuzatib borishdi. Ma’lum bo‘lishicha, yogurtni muntazam iste’mol qilgani bilan, tadqiqot ishtirokchilarida na jismoniy va na ruhiy o‘zgarish bo‘lgan.
Tadqiqotda ishtirok etib, muntazam ravishda yogurt iste’mol qilib borgan odamlarning salomatligi bilan bog‘liq hayoti sifati yogurt iste’mol qilmayotganlarnikidan deyarli farq qilmagan.
Olimlarning ta’kidlashlaricha, tadqiqotlarda odatda ratsionning alohida tarkibiy qismlari emas, balki sog‘lom ovqatlanishdan chiqadigan samara baholanadi, shu sababli ham yogurtlarning foydali ekanligi kabi afsonalar paydo bo‘lgan bo‘lishi mumkin.
Izoh (0)