“Odnoklassniki” ijtimoiy tarmog‘i 17-aprel kuni Vladivostokda yashovchi foydalanuvchisini, u “Ochiq Rossiya” (“Otkritaya Rossiya”) tashkilotiga tegishli videorolikni o‘z profiliga joylashtirganidan so‘ng, bloklab qo‘yib, bu videorolikni tarqatishni boshqa foydalanuvchilarga ham taqiqladi. Bu haqda TJ xabar bermoqda.
Foydalanuvchi Putin ishtirokidagi videoni qaytadan yuklashga urinib ko‘rganida, “Odnoklassniki” YouTube’dan olingan bu videoni ijtimoiy tarmoqda ulashib bo‘lmasligini bildirgan. TJ tahririyati ushbu holatni tekshirganida, “Kiritilgan matnda mumkin bo‘lmagan so‘zlar yoki fikrlar bor” degan bildirishnoma chiqqan.
“Odnoklassniki”ning egasi hisoblangan Mail.Ru Group vakillarining TJ’ga ma’lum qilishlaricha, bu videoning e’lon qilinishiga nisbatan taqiq “xatolik mahsuli bo‘lishi mumkin”. TJ’ning kompaniyaga murojaatidan so‘ng, rolikni “Odnoklassniki”da yana ulashish mumkin bo‘lgan.
“Odnoklassniki”da tarqatilishi vaqtincha cheklab qo‘yilgan video “Ochiq Rossiya” tashkilotining saytida 16-aprel kuni, Rossiya prezidenti Vladimir Putinning navbatdagi bevosita muloqoti arafasida e’lon qilingan edi. Unda Putinning 2002-yildan beri tashkil etilgan bevosita muloqotlarida bergan va bajarilmagan va’dalari haqida so‘z boradi.
Izoh (0)