Axel Springer Russia noshirlik uyi bosh direktori Regina fon Flemming Rossiyaning eng yirik mobil aloqa operatori – “MTS” direktorlar kengashi a’zoligiga nomzodlar ro‘yxatiga kirdi. Bu haqda RBC.ru xabar bermoqda.
“MTS” matbuot xizmatining “Interfaks”ga bayon qilishicha, fon Flemming “MTS”ning 51,46 foiz aksiyasiga egalik qiluvchi “Sistema” korporatsiyasi tomonidan mustaqil nomzod sifatida ilgari surilgan.
“Regina fon Flemming istiqbolda “MTS”ning media sohasidagi yirik loyihalarini kuchaytirishi mumkin. U Germaniyaning Axel Springer konserni bo‘linmasi – Axel Springer Russia noshirlik uyi bosh direktori sifatida zarur tajribaga ega. Axel Springer SE ofisi Reginaning “MTS” direktorlar kengashi a’zosi bo‘lish borasidagi istagidan xabardor va bunga hech qanday qarshilik yo‘q”, - dedi “Sistema” vakili Sergey Kopitov.
“MTS” direktorlar kengashi a’zoligiga nomzodlarning tasdiqlangan ro‘yxatidan jami 10 kishi – “Sistema” prezidenti Mixail Shamolin, “Sistema” ijrochi vitse-prezidenti Aleksandr Gorbunov, “Sistema” yetakchi vitse-prezidentlari Vsevolod Rozanov va Sergey Drozdov, Sistema Shyam TeleServices Ltd. direktorlar kengashi raisi Ron Zommer, “MTS” prezidenti Andrey Dubovskov, shuningdek, mustaqil nomzodlar – Mishel Komb, Stenli Miller, Tomax Xoltrop va Regina fon Flemming o‘rin olgan.
Ayni vaqtda, 10 nomzodning sakkiz nafari (Drozdov, Dubovskov, Gorbunov, Zommer, Komb, Miller, Rozanov va Xoltrop) “MTS”ning amaldagi direktorlar kengashi a’zolari hisoblanadi. Amaldagi kengash a’zolaridan “Sistema” birinchi vitse-prezidenti Anton Abugov nomzodlar ro‘yxatidan joy olmagan.
“MTS” aksiyadorlarining yillik majlisi 2015-yil 25-iyun kuni o‘tkazilishi rejalashtirilgan. Unda, xususan, direktorlar kengashining 2014-yil uchun 40,42 milliard rubl miqdoridagi dividendlarni to‘lash haqidagi qarori qabul qilinishi rejalashtirilgan.
Izoh (0)