Mem-bolaning mashhurligi otasining davolanishi uchun o‘n minglab dollar pul to‘plashda asqotdi

Mashhur “Omadli bola” memidagi bolakay ulg‘aydi va endi otasining davolanishi uchun pul yig‘moqda. Bu haqda Meduza.io xabar berdi.

Bolaning otasi – Jastin Grinerni qo‘llab-quvvatlash haqida Daily Dot, Buzzfedd va ABC News kabi ommaviy nashrlar yozdi, bu esa pul to‘plashga katta yordam berdi.

2006-yili Jastin Grinerga buyrak xastaligi tashxisini qo‘yishgan, oradan uch yil o‘tib uning buyraklari ishlamay qolgan: shundan beri u organizmni tozalash uchun buyrakni dializ qilish amaliyotini o‘tab keladi. So‘nggi vaqtlarda Griner buning uchun haftasiga 12 soatgacha vaqt ajratishga majbur bo‘lmoqda.

Uning turmush o‘rtog‘i Leyni Griner buyrakni ko‘chirib o‘tkazishga pul to‘plash uchun kampaniya boshlagan. Uning tan olishicha, dastlab u farzandining mashhurligidan foydalanmoqchi bo‘lmagan, biroq keyinroq bu narsa pul to‘plashga yordam berishini tushunib yetgan.

Ushbu xabar yozilayotgan vaqtda zarur 75 ming dollar mablag‘ning 30 ming dollari to‘plab bo‘lingandi.

Memga aylanib ketgan fotosurat esa 2009-yil avgustida olingan – o‘sha vaqtda Semmi endigina 11 oylik bo‘lgandi.