Axel Springer Russia ноширлик уйи бош директори Регина фон Флемминг Россиянинг энг йирик мобил алоқа оператори – «МТС» директорлар кенгаши аъзолигига номзодлар рўйхатига кирди. Бу ҳақда RBC.ru хабар бермоқда.
«МТС» матбуот хизматининг «Интерфакс»га баён қилишича, фон Флемминг «МТС»нинг 51,46 фоиз акциясига эгалик қилувчи «Система» корпорацияси томонидан мустақил номзод сифатида илгари сурилган.
«Регина фон Флемминг истиқболда «МТС»нинг медиа соҳасидаги йирик лойиҳаларини кучайтириши мумкин. У Германиянинг Axel Springer концерни бўлинмаси – Axel Springer Russia ноширлик уйи бош директори сифатида зарур тажрибага эга. Axel Springer SE офиси Регинанинг «МТС» директорлар кенгаши аъзоси бўлиш борасидаги истагидан хабардор ва бунга ҳеч қандай қаршилик йўқ», - деди «Система» вакили Сергей Копитов.
«МТС» директорлар кенгаши аъзолигига номзодларнинг тасдиқланган рўйхатидан жами 10 киши – «Система» президенти Михаил Шамолин, «Система» ижрочи вице-президенти Александр Горбунов, «Система» етакчи вице-президентлари Всеволод Розанов ва Сергей Дроздов, Sistema Shyam TeleServices Ltd. директорлар кенгаши раиси Рон Зоммер, «МТС» президенти Андрей Дубовсков, шунингдек, мустақил номзодлар – Мишель Комб, Стенли Миллер, Томах Холтроп ва Регина фон Флемминг ўрин олган.
Айни вақтда, 10 номзоднинг саккиз нафари (Дроздов, Дубовсков, Горбунов, Зоммер, Комб, Миллер, Розанов ва Холтроп) «МТС»нинг амалдаги директорлар кенгаши аъзолари ҳисобланади. Амалдаги кенгаш аъзоларидан «Система» биринчи вице-президенти Антон Абугов номзодлар рўйхатидан жой олмаган.
«МТС» акциядорларининг йиллик мажлиси 2015 йил 25 июнь куни ўтказилиши режалаштирилган. Унда, хусусан, директорлар кенгашининг 2014 йил учун 40,42 миллиард рубль миқдоридаги дивидендларни тўлаш ҳақидаги қарори қабул қилиниши режалаштирилган.
Изоҳ (0)