Amerikalik mashhur aktyor Robert De Niro Italiyada yangi loyiha boshlamoqda. “TASS” xabariga ko‘ra, 71 yoshli De Niro Italiyaning jahondagi timsoliga aylangan mashhur avtomobil markasi asoschisi Entso Ferrari rolini o‘ynaydi.
Mahalliy OAVning De Nironing o‘ziga asoslanib xabar berishicha, asosiy qismi Italiyada suratga olinadigan filmga Entsoning o‘limidan yetti yil avval – 1981-yili chiqargan “Ferrari-80” nomli avtobiografik kitobi asos qilib olingan.
Shunga qaramay, bir vaqtning o‘zida film prodyuseri ham hisoblangan Robert De Nironing so‘zlariga ko‘ra, bu shunchaki biografik hikoya emas, balki “personaj hayotining barcha xorg‘in va yorqin tomonlari, muvaffaqiyat va tashvishlari bilan birga jonlantirishga urinish” bo‘ladi.
“Budjeti katta bo‘lgan bu film “Ferrari” deb nomlanadi. Drama janrida suratga olinishi rejalashtirilayotgan film ancha katta – 1945-yildan 1980-yilgacha bo‘lgan davrni qamrab oladi”, - dedi De Niro.
Agar rejissyor sifatida Klint Istvudni taklif qilish uddasidan chiqilsa, loyiha qiymati yanada oshadi. “Biz unga taklif bilan chiqdik va u qiziqish bildirdi, biroq dastlab ssenariyga baho bermoqchi”, - dedi Gollivuddagi italiyalik nufuzli prodyusserlardan biri Janni Botsaki.
Taxminlarga ko‘ra ssenariy ustida Oliver Stounning “Nikson” (1995-yilda suratga olingan) filmidagi ishi uchun “Oskar”ga loyiq ko‘rilgan Stiven Rivel va Kristofer Uilkinson ishlashi mumkin.
“Ferrari” filmi 2016-yilda ekranlarga chiqishi rejalashtirilgan.
Izoh (0)