“Real”, “Manchester Yunayted” va “Barselona” futbolkalari dunyo bo‘ylab eng ko‘p sotilishi ma’lum bo‘ldi

Liboslar sotilishi futbol klublariga eng katta daromad keltiradigan sohalardan biri hisoblanadi. “Championat.com” 2014-yilda futbolkalari dunyo bo‘ylab eng ko‘p sotilgan klublar o‘nligini e’lon qildi.

10-o‘rinda Italiyaning “Milan” klubi bo‘lib, 2014-yilda 350 mingta futbolkasi sotilgan. Eng ko‘p futbolkasi sotilgan o‘yinchilar El Shaaravi, Xonda, de Yong bo‘lgan. Milanning yana bir klubi “Inter”ning sotilgan futbolkalari 425 mingni tashkil qilgan, Ikardi, Palasios va Nagatomoning futbolkalari eng ko‘p sotilgan. Italiyaning yana bir jamoasi “Yuventus” futbolkalarining 480 mingtasi sotilgan, Pirlo, Pogba va Tevesning futbolkalari ko‘proq sotilgan.

800 mingta futbolka sotgan “Arsenal”da O‘zil, Uilshir, Sanches, 810 mingta futbolka sotgan “Liverpul”da Jerrard, Starrij, Koutinyo, 880 mingta futbolka sotgan “Bavariya”da Lam, Shvaynshtayger, Riberi, 910 mingta futbolka sotgan “Chelsi”da Terri, Azar, Oskarning liboslari ko‘proq foyda keltirgan.

Kuchli uchlikdagi jamoalar 1 milliontadan ko‘proq futbolka sotgan. “Barselona” (1,15 million) a’zolari Messi, Neymar, Xavi, “Manchester Yunayted” (1,4 million) futbolchilari Runi, Van Persi, Mata, “Real” (1,41 million) a’zolari Ronaldu, Beyl, shuningdek sobiq futbolchisi Xabi Alonsoning futbolkalari ko‘proq sotilgan.