O‘zbekiston Respublikasi Prezidenti tomonidan Vazirlar Mahkamasining 2014-yil 17-yanvarda o‘tkazilgan yig‘ilishida belgilab berilgan 2014-yilda mamlakatni ijtimoiy-iqtisodiy rivojlantirishning ustuvor yo‘nalishlari doirasida amalga oshirilgan chora-tadbirlar natijasida respublikada makroiqtisodiy barqarorlik va iqtisodiyotning yuqori sur’atlarda o‘sishi ta’minlandi. Bu haqda O‘zbekiston Respublikasi Markaziy banki rasmiy saytida xabar berildi.
2014-yil yakuni bo‘yicha O‘zbekistonda yalpi ichki mahsulot (YaIM) ishlab chiqarish hajmining 2013-yilga nisbatan real o‘sishi 8,1 foizni va uning nominal hajmi 144,9 trillion so‘mni tashkil etdi.
2014-yilda mamlakat iqtisodiyotining barcha tarmoqlarida mahsulot ishlab chiqarish va xizmatlar ko‘rsatish hajmlarining yuqori sur’atlarda o‘sishi kuzatildi.
Xususan, sanoat mahsulotlari ishlab chiqarish umumiy hajmi 2013-yilga nisbatan 8,3 foizga, shu jumladan, iste’mol tovarlari ishlab chiqarish hajmi 9,4 foizga oshdi.
Sanoatda yuqori o‘sish sur’atlari zamonaviy va ilg‘or texnologiyalarga asoslangan mashinasozlik va metallni qayta ishlash (o‘sish sur’ati 13,5 foiz), yengil sanoat (16,1 foiz) hamda qurilish materiallari (10,7 foiz) sanoati tarmoqlarida kuzatildi.
Qishloq xo‘jaligi sohasini intensiv asosda rivojlantirish, yerlarning meliorativ holatini tubdan yaxshilash, seleksiya ishlarini chuqurlashtirish, mazkur tarmoqda ishlab chiqarishni texnik va texnologik yangilash hamda zamonaviy agrotexnologiyalarni joriy etish bo‘yicha chora-tadbirlarning izchillik bilan davom ettirilishi natijasida 2014-yilda qishloq xo‘jaligida mahsulot ishlab chiqarish hajmi 2013-yilga nisbatan 6,9 foizga oshdi.
Shu jumladan, dehqonchilik mahsulotlarini yetishtirish hajmi 6,9 foizga, chorvachilik mahsulotlarini yetishtirish hajmi esa 7,0 foizga oshdi.
2014-yilda bozor xizmatlari ko‘rsatish hajmi 2013-yilga nisbatan 15,7 foizga o‘sib, uning YaIM tarkibidagi ulushi 54 foizni tashkil etdi.
Xizmat ko‘rsatish sohasida yuqori o‘sish sur’atlari moliyaviy xizmatlar (33,9 foiz), aloqa va axborotlashtirish (24,5 foiz), kompyuter dasturlash (21,6 foiz), maishiy xizmatlar (20,7 foiz), qurilish (18,3 foiz) hamda savdo va umumiy ovqatlanish (17,5 foiz) sohalarida kuzatildi.
Izoh (0)