AQSh Milliy xavfsizlik agentligi (MXA) Sony Pictures kinokampaniyasiga nisbatan uyushtirilgan katta hajmdagi xakerlik hujumini tekshirib, Oq uyga bu borada KXDRni rasman ayblashga imkon hosil qilib berdi, deb xabar bermoqda “RBK”.
The New York Times xabariga ko‘ra, MXA Shimoliy Koreya kompyuter tizimlarini 2010-yildan buyon kuzatadi. Buning uchun MXA KXDR kiberhududini tashqi dunyo bilan bog‘laydigan Xitoy serverlariga kirgan. Bunda ularga Janubiy Koreya va boshqa ittifoqchilar yordam bergan. Odatda razvedka ma’lumotlariga ishonmaydigan Barak Obama ham Sony Pictures’ga hujum borasida ularga ishongani qayd etilgan.
Shimoliy koreyalik olti mingga yaqin xakerlarning aksariyati Bosh razvedka byurosiga bo‘ysunishi aytilgan. Ular kinokompaniyaga kiberhujum uyushtirish uchun ikki oy uringan. Tizimga oid ma’lumotlarni o‘g‘irlashga muvaffaq bo‘lingachgina ular hujumni to‘liq hajmda amalga oshirgan. Hujum nima uchun bunchalik katta masshtabda uyushtirilgani maxsus xizmatlar uchun haligacha sirligicha qolmoqda.
Eslatib o‘tamiz, AQSh Shimoliy Koreyani 2014-yil dekabr oyi so‘ngida efirga chiqarilgan Kim Chen Inga suiqasd uyushtirilishi haqidagi filmga javoban Sony Pictures kinokompaniyasiga xakerlik hujumi uyushtirganlikda ayblanmoqda. Shu asnoda 2015-yil boshida Vashington KXDRga nisbatan yangi sanksiyalar ham joriy etdi.
Izoh (0)