Tez orada irsiy modifikatsiya qilingan bolalar tug‘ila boshlashi mumkin
Texnologiyalarning tez rivojlanishi sharofati bilan yaqin orada fan irsiy modifikatsiya qilingan bolalarni yarata oladi, deb hisoblaydi Angliyaning Bata universiteti olimlari. Bu haqda “Korrespondent.net” xabar bermoqda.
Ulardan biri, hayvonlarni klonlashtirish sohasida kashfiyotchi bo‘lgan doktor Toni Perri genetikada inqilob sodir bo‘lganini ma’lum qildi.
Scientific Report jurnalida chop etilgan maqolasida u DNK molekulasida sichqonlar genomini sun’iy o‘zgartirish mexanizmlarini batafsil tushuntirib berdi. U ushbu usul samaradorligi 100 foizga yaqinlashayotganini aytdi.
“Genetik tadqiqotlar so‘nggi ikki yil ichida shunchalik ildamlab ketdiki, chaqaloqlar tuzilishini ‘loyihalashtirish’ fantastika bo‘lmay qoldi”, — dedi u.
Toni Perri so‘zlariga ko‘ra, inson irsiy modifikatsiyasi mexanizmlari kasallikning dastlabki shart-sharoitlarini bartaraf etishga qaratilgan, va jamiyat ham, hukumat ham ushbu masala bo‘yicha jiddiy bahsga tayyor bo‘lishi kerak.
