2015-yil 16-yanvar kuni Toshkent shahrida O‘zbekiston “Milliy tiklanish” demokratik partiyasi Markaziy Kengashining navbatdagi Plenumi bo‘lib o‘tdi. Bu haqda O‘zMTDP Axborot xizmati “Daryo”ga ma’lum qildi.
Unda O‘zbekiston “Milliy tiklanish” demokratik partiyasi Markaziy Kengashi, Oliy Majlis Qonunchilik palatasidagi partiya fraksiyasi va xalq deputatlari mahalliy Kengashlardagi partiya guruhlari a’zolari, partiya faollari va ommaviy axborot vositalari vakillari ishtirok etdilar.
Plenumda 2015-yil 29-mart kuni bo‘lib o‘tadigan O‘zbekiston Respublikasi Prezidenti saylovida O‘zbekiston “Milliy tiklanish” demokratik partiyasining ishtiroki, O‘zbekiston Respublikasi Prezidentligiga “Milliy tiklanish” demokratik partiyasidan nomzod ko‘rsatish taklifi hamda partiyaning navbatdagi Syezdini chaqirish to‘g‘risidagi masalalar muhokama qilindi.
Plenumda e’tirof etilganidek, O‘zbekiston Respublikasi Markaziy saylov komissiyasi tomonidan 2014-yilning 26-dekabridan O‘zbekiston Respublikasi Prezidenti saylovi bo‘yicha saylov kampaniyasi boshlanganligi e’lon qilindi. Shuningdek, O‘zbekiston Respublikasi Prezidenti sayloviga tayyorgarlik ko‘rish va uni o‘tkazish bo‘yicha asosiy tadbirlar dasturi tasdiqlandi.
O‘zbekiston “Milliy tiklanish” demokratik partiyasining Ustavida partiyaning O‘zbekiston Respublikasi Prezidentligiga bo‘lib o‘tadigan saylovlarda ishtirok etishi belgilangan.
Shundan kelib chiqqan holda Plenumda partiyaning O‘zbekiston Respublikasi Prezidenti saylovida ishtirok etishi to‘g‘risida qaror qabul qilindi.“Milliy tiklanish” demokratik partiyasidan O‘zbekiston Respublikasi Prezidentiligiga nomzod tavsiya etish masalasi Plenum ishtirokchilarining fikr-mulohazalari va takliflari asosida ko‘rib chiqildi. Bu masalada Oliy Majlis Qonunchilik palatasidagi “Milliy tiklanish” demokratik partiyasi fraksiyasining a’zosi Akmal Xolmatovich Saidov nomzodini partiyadan O‘zbekiston Respublikasi Prezidentligiga nomzod sifatida ko‘rsatish qo‘llab-quvvatlandi.
Amaldagi saylov qonunchiligiga asosan O‘zbekiston Respublikasi Prezidenti lavozimiga partiya tomonidan nomzod ko‘rsatish partiyaning oliy organi – syezdi tomonidan amalga oshiriladi. Shundan kelib chiqib, Plenumda joriy yil 7-fevral kuni partiyaning navbatdagi IV Syezdini chaqirish va bu masalani Syezd muhokamasiga qo‘yishga kelishib olindi.
Plenum so‘ngida muhokama etilgan barcha masalalar yuzasidan tegishli qarorlar qabul qilindi.
Izoh (0)