Toshkent jamoat transportida ikki yil ichida kontaktsiz to‘lov tizimi joriy etiladi

“Toshshahartransxizmat” AK ikki yil ichida Toshkent jamoatchilik transportida smart-karta orqali kontaktsiz to‘lov tizimini yo‘lga qo‘yishni rejalashtirmoqda, deb yozadi Uzbekistan Today.

Yangi tizim bo‘yicha bosib o‘tilgan masofaga qarab pul to‘lanadi va yo‘lkira to‘lovi tahlilidan kelib chiqib, yo‘nalish tarmog‘i yanada optimallashtiriladi.

Kompaniya tizimni joriy etish bo‘yicha sakkizta, jumladan ikkita mahalliy kompaniyadan kelib tushgan takliflarni ko‘rib chiqmoqda. Ayni paytda xalqaro tajriba ham o‘rganilmoqda.

“Biz moliyalashtirish masalalarini ham hal etishimiz zarur, bu maqsadlarga kredit mablag‘lari jalb etilishi ham mumkin. Yakuniy ekspertizadan so‘ng loyiha ko‘rib chiqish uchun hukumatga yo‘naltiriladi”, — dedi “Toshshahartransxizmat” AK boshqaruv raisi Otabek Sodiqov.

Uning ta’kidlashicha, avtobuslar sonidan kelib chiqib, tizimni joriy etish uchun 3—4 oy talab etiladi.