“Sharq” nashriyot uyi tomonidan “XIX—XX asrlarda o‘zbeklarning milliy bosh kiyimlari” albom kitobi chop etildi, deya xabar bermoqda “12news.uz”. Unga tarix fanlari doktori, professor Nafisa Sodiqova va Kamoliddin Behzod nomidagi milliy rassomlik va dizayn instituti bitiruvchisi Yulduz G‘aybullayeva mualliflik qildi.
Kitobda muzey fondlaridagi noyob bosh kiyimlar namunalari namoyish etilgan. Ular mintaqalar, aholining ijtimoiy kelib chiqishi, yosh belgilari va maqsadlariga ko‘ra turlarga bo‘lingan. Ayollar bosh kiyimlari — turli o‘lchamdagi va turlicha o‘raladigan ro‘mollar, sallalar (loki, bosho‘rov, dastor) keng tanishtirilgan.
Ayollar, kelinchaklar va bolalar bosh kiyimlarini yasatishda qo‘llanilgan zargarlik buyumlari to‘g‘risidagi bo‘lim ham qiziqarlidir. Shuningdek erkaklar va bolalar bosh kiyimlari: sallalar, mo‘ynali telpaklar, kigiz telpaklar va do‘ppilarga alohida bo‘lim bag‘ishlangan.
Kitob rangli fotosuratlar bilan boyitilgan, uning matn qismi o‘zbek, ingliz va rus tillarida berilgan.
Izoh (0)