AQShning O‘zbekistondagi yangi elchisi qasamyod qildi

AQShning Favqulodda va Muxtor Elchisi Pamela Spratlen AQShning O‘zbekistondagi elchisi sifatida qasamyod qildi, deya xabar bermoqda UzDaily.

Nashrning eslatishicha, 2014-yil dekabrida AQSh Senati Pamela Spratlen nomzodini AQShning O‘zbekistondagi elchisi lavozimiga tasdiqlagan edi.

Spratlen bungacha 2011-yildan AQShning Qirg‘izistondagi elchisi sifatida faoliyat yuritib kelgan.

Avvalroq Amerikaning O‘zbekistondagi elchixonasiga 2011-yil iyunidan boshlab rahbarlik qilgan Jorj Kroll esa AQShning Qozog‘istondagi diplomatik missiyasini boshqarishi xabar berilgan edi.

Pamela Spratlen (60 yoshda) AQShning Ogayo shtati Kolambus shahrida tug‘ilgan. Kaliforniyadagi Uellsli kolleji va Berkli universitetini tugatgan. To‘qqiz yil davomida vakillar palatasining Kaliforniya shtatidagi byudjet qo‘mitasida maslahatchi bo‘lib ishlagan, so‘ng AQSh davlat departamentida iqtisodchi lavozimida faoliyat yuritgan. Spratlen, shuningdek AQShning Vladivostokdagi bosh konsuli sifatida faoliyat olib borgan, AQShning Ostonadagi elchixonasida ishlagan.